Library
Profile
लोकमान्य टिळकांचा पोवाडा
लोकमान्य टिळकांचा पोवाडा
नमन हो स्वातंत्र्य देवीला
भारत मातेला
पुण्य भूमीला
तिजसाठी प्राण ज्याने दिला
तिजसाठी प्राण ज्याने दिला
देह झिजविला
लढा उभारीला
वंदू त्या टिळकचरणाला .........।।१।।
आंग्लप्रभुत्वाचा होता काळ
जनतेसाठी काळ
जुलूमाला सुकाळ
अश्या वेळी जन्मला हा बाळ
अश्या वेळी जन्मला हा बाळ
देशभक्तीशी नाळ
स्वातंत्र्याची सकाळ
स्मरणात राहील त्रिकाळ ...........।।२।।
इंग्रजांचे दुष्ट सरकार
भयंकर क्रूर
टिळक सिद्धकर
आणिले डोके ठिकाणावर
आणिले डोके ठिकाणावर
बंधू चाफेकर
तात्या सावरकर
घडविले असे धुरंधर ............।।३।।
असंतोषाची केली हो चाल
संघटनाची ढाल
पाहुनी जनकौल
उत्सवांचा वाजविला ढोल
उत्सवांचा वाजविला ढोल
कार्य बहुमोल
इंग्रजांचे हाल
केसरीचे निनादले बोल ...........।।४।।
इंग्रजांनी बांधियला चंग
दाविला तुरुंग
तेथेही उत्तुंग
कर्मयोगाचा घडवी शृंग
कर्मयोगाचा घडवी शृंग
ग्रंथिले अथांग
वेदांग, पंचांग
गुणकीर्तनी होतो मी दंग ..........।।५।।
