दीपोत्सव

दीपोत्सव आजकाल, दिव्यांचा राहिला नाही ।

लाभ झगमगाटाचा, वातीस कळला नाही ।।1।।

विजयश्री मिळवून, जरी परतला राम ।

वनवास वैदेहीचा, आजही संपला नाही ।।2।।

गर्विष्ठ साज दुनिया, ल्याली लख्ख प्रकाशाचा ।

उत्सव तेजाचा आता, पवित्र उरला नाही ।।3।।

प्रकाशदंभात होते, जे जळत रातदिन ।

अंधकार अंतरीचा, जाणून पाहिला नाही ।।4।।

मूर्तीच फक्त पुजूनी, केली भव्य महापूजा ।

आदर गृहलक्ष्मीला, कधीच दाविला नाही ।।5।।

स्वप्रकाशात तयांचा, कर्णकटू कोलाहल ।

चेतवून कोटी सूर्य, काजवा बोलला नाही ।।6।।

तू दिव्यतेजाची रास, मज वारसा तमाचा ।

दिपकराग अपुल्या, प्रेमाचा जुळला नाही ।।7।।

मातापित्यास दुखवी, मदांध घातकी बंधू ।

सण तो भाऊबीजेचा, म्हणून पाळला नाही ।।8।।