मराठीचा संक्षिप्त इतिहास

(आर्या)

महाराष्ट्री प्राकृता, मंथने प्राप्त भाषा-नवनीता ।

जनपदप्रिया सुगीता, सप्तशतके हाल-हृदय-अंकिता ।।१।।

(इंद्रवज्रा)

उत्तुंग मूर्ती बनवी सुरेखे ।

त्या भूपतीला स्तविले सुलेखे ।

अद्याप विश्वात चमुंडराया ।

तो ज्ञात आहे विजये कराया ।।२।।

(ओवी - १०,१०,१०,८)

वेदवेदांत ज्ञान अमिता । विवेकसिंधुमाजी चर्चिता ।

संस्कृतस्वर्गीची गंगागीता । प्रगटली ज्ञानदेवी ।।३।।

(वसंततिलका)

म्हाईंभटे सकल चक्रधरास ग्रंथी ।

लीळाचरित्र प्रभुचे प्रसवी स्वकंठी ।

नागेश, विठ्ठल, नरेंद्र, मयूरपंते ।

चोखा, तुका, कवन गात मधूर संते ।।४।।

(भुजंगप्रयात)

मनोरम्य आख्यान ते नैषधाचे ।

हरीकीर्तनी श्लोक पाही मनाचे।

नवा कोश रक्षार्थ काढी शिवाजी।

तयाचे म्हणोनी सुकर्तृत्व गाजी ।।५।।

(अनुष्टुभ)

शास्त्रललित लेखांचे, आज आगार होतसे ।

साहित्यरत्न मोलांचे, मराठीतून येतसे ।।६।।

मराठीचा 'म' गाजेल, तोच अंगात बाणता ।

तो 'म' व्हावा महाज्ञान, मानवता महानता ।।७।।