प्रेम खरे अन परखड होते

नको त्या विषयावर सुरू तिची बडबड होते

शांत राहू की बोलू माझीही मग गडबड होते

सुर माझा मी जरासा जपूनच लावतो आता 

हुकला तर मग प्रकरण फारच अवघड होते

ती नसली की, स्वतंत्र असतो भारत माझा 

अचानक ती समोर आली की धडधड होते

हल्ली बरीच कामे उरकून घेतो न सांगता 

राहिले एखादे तर भांड्यांची खडखड होते

रुसवे फुगवे वाढवतात गोडी जगण्यातली 

नाहीच झाले तर भावनांची मग परवड होते

संयम,अबोला,कटाक्ष रंग असती नात्यांचे

म्हणूनच बहुधा प्रेम खरे अन परखड होते

क्षण आनंदाचे जात असतात निसटून काही

राहिलेले थोडेच जपण्याची मग धरपड होते