आभाळ ठेंगणं...

अलिखित संकेत जगाचे कुठवर पाळशील

मनातल्या मनात मांडे कुठवर भाजशील ?

होईल ते होऊ देत, प्रेम कर ध्येयाप्रती पाखरासारखं ..

जीवन उधळून मनसोक्त, बिनधास्त ...

अंगवळणी पडलेल्या वाटेवर कुठवर चालशील

मनातलं आभाळ केव्हा पेलशील ...

अरे ! घरटं काय कधीही बांधता येईल...

कवेत घे आभाळ सारं ,मार उंच भरारी ...

अरे अडवतील तुला पावला - पावलावर

चिडवातीलही तुला अपयश आल्यावर

पण जेव्हा घेशील तू गरुड भरारी तेव्हा

तेच होतील फितूर अन तव स्वागतास असतील आतूर....

अरे ! चारचौघांसारखं आयुष्य तर सारेच जगतात

उगवत्या सूर्याला नमस्कारहि सर्वच करतात

पीक भरात आलं म्हणजे सर्वच पक्षी गातात गाणी

रिवाज इथला, अपयशाचा वाली नसतो कुणी ?

अरे ! चिंता कसली करतोस लढ बिनधास्त

मनातलं सारं ठरवलेलं करून टाक एकदाचं...

यशोशिखरं केव्हाची आतुरतेनं वाट बघतेय तुझी

कर्तृत्वाला आता लावू नकोस लगाम होऊ दे आभाळ ठेंगणं...