સરદારનું ગીત - પર

બે કામ (ઈ,સ, ૧૯૩૪-’૩પ)

પુસ્તકાલયનું દાન, વિદ્યાપીઠે કરેલ રે;

મ્યુનિસિપાલિટી એની, હકદાર બનેલ રે,

આ વાત સરદારે તો, પસંદ ન કરેલ રે;

જેલમાંથી થતા છૂટા, તપાસ આદરેલ રે,

આમ રાખી શકે એમાં, અંકુશ સરકાર રે;

કરી શકે ન આ વાત, પસંદ સરદાર રે,

ગાંધીજીને મળી તેઓ, ઘણો કરે વિચાર રે;

ત્યાં તેઓએ કરી વાત, બતાવી અધિકાર રે,

ગાંધીજીએ પછી કહ્યું, હવે એક ઉપાય રે;

અધિકાર વિના દાન, પાછું લઈ શકાય રે,

કનૈયાલાલ પાસે જૈ, અભિપ્રાય મગાય રે;

ભૂલાભાઈ સૂણી વાત, એમાં સંમત થાય રે,

ધારાશાસ્ત્રી ઘણા બીજા, આ મતના થયેલ રે;

ઠરાવ કરતા તેમાં, જીત મળી ગયેલ રે,

પુસ્તકાલયને પાછું, વિદ્યાપીઠે રખાય રે;

ને સરદારની બુદ્ઘિ, મારી મેદાન જાય રે,

બોર્સદ તાલુકા માટે, પ્લેગ વેરી થયેલ રે;

લોકોમાં ભયનું જોર, ખૂબ વધી ગયેલ રે,

સરદાર સુણી વાત, શાંત નો’તા રહેલ રે;

ત્રેવીસ ત્રણ પાંત્રીસે, બોરસદ ગયેલ રે,

દવાઓ પાડવા પૂરી, છાવણી ગોઠવેલ રે;

ને સ્વયંસેવકો એમાં, કામે લાગી ગયેલ રે,

ઉંદરોનો કરે નાશ, સફાઈ ખૂબ થાય રે;

ઘર ને ફળિયામાંથી, જંતુ દૂર કરાય રે,

કોઈક સ્થળ લોકોની, અંધશ્રદ્ઘા નડેલ રે;

પ્લેગને કોપ દેવીનો, માની બેસી ગયેલ રે,

ઘરે ઘરે ફરી આપે, સમજ સરદાર રે;

પ્લેગને કરવા માટે, અહીંથી હદપાર રે,

**

ખાટે જો જશ કોંગ્રેસ, સરકાર સહે નહીં;

બહાનાં એટલાં કાઢે, તોયે ન આબરૂ રહી,

(ક્રમશ:)