સમય

મુઠ્ઠીની રેત સમ સરતાં સમયની વાત કરવી છે;

પ્રહર, પલ, યુગ થઈ ફરતાં સમયની વાત કરવી છે.

સમય ચોપાટ કાળે પાથરી ને માનવી પ્યાદા;

ક્ષણોનેે દ્વિજ થઈ ચરતાં સમયની વાત કરવી છે.

ભરી યાદો પિટારે કેડમાં કૂંચી લઈ ફરતો;

કશુંક ખંખેરો ત્યાં ખરતાં સમયની વાત કરવી છે.

કદિ કો' કાળ કોટડીએ લઈ અંધાર એ જન્મે;

નયનથી અશ્રુ થઈ ઝરતાં સમયની વાત કરવી છે.

ભીડી લ્યે બાથ હો સામે ધુરંધર હો ભલે બળિયો;

કદિ શમણાંથી પણ ડરતાં સમયની વાત કરવી છે.

કદિ ડૂબે વળી ખાબોચિયે જઈ નીર હો થોડાં;

વમળમાં મોજથી તરતાં સમયની વાત કરવી છે.

થઈને એ ફરેબી ભીખમાં લઈ લ્યે કવચ-કુંડળ;

ને પહેરો પ્રેમથી ભરતાં સમયની વાત કરવી છે.

ભૂખે તરસે એ સુવાડે કોઈને બાણશૈયા પર;

મુઠ્ઠી તાંદુલની ધરતાં સમયની વાત કરવી છે.

લૂંટાતી લાજ હો ત્યાં વસ્ત્રવાયુ થઈને વીંટાતો;

કોઈનાં ચીરને હરતાં સમયની વાત કરવી છે.