જ્યાં ગુજરાતી હું

કૈંક નદીનાં નીર તણો પાવન સંગમ,

વાયુ ભીતર વેદ વાત ચર્ચાતી જ્યાં ગુજરાતી હું;

ઉગમણે ઓરડીયે બેઠી બિરદાળી,

અમીનજરથી પ્રેમપિયલો પાતી જ્યાં ગુજરાતી હું;

મહેરામણની લાલ કસુંબી લહેરો પણ,

ગીત ગુર્જરી વાયુ થઈને ગાતી જ્યાં ગુજરાતી હું;

અન્નકૂટ ઓચ્છવ ને છપ્પન ભોગ વળી,

મહાઆરતી સોમનાથની થાતી જ્યાં ગુજરાતી હું;

વિપ્ર સુદામા સાથે મોહન મદમાતો,

લોખંડીની સિંહ સમી છે છાતી જ્યાં ગુજરાતી હું;

લઈ પ્રતિજ્ઞા બેઠી નર્મદ પાઘડીએ,

ઝવેર કેરી ચારણકન્યા રાતી જ્યાં ગુજરાતી હું;

નમાજ ગુંજે કચ્છડે કાયમ ગેબીને,

તેજ કટારી ત્યાં છે તોરલ તાતી જ્યાં ગુજરાતી હું;

ડણકું દેતાં ડાલામથ્થા ગિરિવરમાં,

આમ્ર મંજરી કેશર થઈ છંટાતી જ્યાં ગુજરાતી હું;

દયાનંદ ને રાજચંદ્ર સા રત્ન અહીં,

ખમીરવંતી ખાંભી પણ પૂજાતી જ્યાં ગુજરાતી હું;

ધારણ કરવો જન્મ અહીં વિરલ ઘટના,

ગર્વ લઈને જે ગુજ્જુ કે'વાતી જ્યાં ગુજરાતી હું.