ન હોય ?

હોય, ન હોય ?

સત્યાવીસમો અક્ષર હોય ! ન હોય ? 

પત્તામાં ત્રેપનમું પાનું હોય ! ન હોય ?     

આંખોમાં તો અવિરત સ્મિત મલકતું,     

પાંપણ પાછળ તળાવ હોય ! ન હોય ?

ઝીણું જંતર અંદર અનાહત નાદ કરે,

ઝાલર ઝણક્યો સુનકાર હોય ! ન હોય ?     

પ્રબુદ્ધ નયને ઝરે નર્યો સૌમ્ય શાંત રસ, 

એ બુધ્ધ નું નૃત્ય પણ હોય ! ન હોય ?

તન-મન આખું મયુર બની થનગન કરે, 

એ મીરા તારું મૌન પણ હોય ! ન હોય ?     

હૈયાં ફરતા હીબકાં ફરે જલકમલવત,   

પાંદડું પાણીથી ભિંજાતુ હોય ! ન હોય.

રાધે-રાધે રટતી આંગળી કરે શંખનાદ,

કાંઈક કાળજું વિંધાતુ ય હોય ! ન હોય ?