લખું છું

અનુભવના મારા ચિતારે લખું છું,

વિચારું છું રાતે, સવારે લખું છું,

હકીકતમાં ડૂબ્યો હતો હું વચોવચ્ચ,

હવે મૃગજળોના કિનારે લખું છું,

હશે સત્ય કડવું મને એ ખબર છે,

અને એટલે એ વધારે લખું છું,

સળગું કબરમાં ચિતામાં દફન છું,

હળવાશથી વાત ભારે લખું છું,

પરિચય બધાને હું મારો શું આપું ?

ગઝલ હું હવે છાશવારે લખું છું,

ઉતાવળ નથી ને અભરખાં છે ઓછા,

વિચારે ચડું છું હું ત્યારે લખું છું,

નથી ફાવતું ક્યાંય લેવાનું ટેકો,

બધું "સ્તબ્ધ" મારા સહારે લખું છું.