કૃષ્ણ કેવા હશે

જેનાથી કૃષ્ણ પ્રસન્ન થઈ જાય, એ કેવી સેવા હશે !

જેનાથી માધવનું મોં મીઠું થાય, કેવા એ મેવા હશે !

બાળક જો જન્મે, ગણે ભાગ્યશાળી માવતર પોતાને

જેના ઘરે કૃષ્ણ જન્મે, એ મા-બાપનાં ભાગ્ય કેવાં હશે !

મિત્ર પાસે મોટર હોય તો આપણે ફુલાઈને ફરીયે

દ્વારકાધીશ જેના મિત્ર હોય, એ સુદામા કેવા હશે !

હવામાં સુગંધ ભળે તો, હવામાન સુગંધીત થઈ જાય

જેમાં વાંસળીના સૂર ભળ્યા હોય, કેવી એ હવા હશે !

દુશ્મન બનીને જન્મ લો, તો પણ તારી દે તારણહાર

તરી જનાર કેટલાંય માસી પૂતના ને મામા જેવા હશે !

જ્ઞાન ગીતાજીનું સાંભળી ને ધન્ય થઈ જવાતું હોય તો,

કર્મનો અધ્યાય કૃષ્ણ મુખે સાંભળે એના કર્મ કેવાં હશે !