કોને કહું

એક જ મનના બે છે વિચારો, સારા નરસા કોને કહું !

અંતરમાં કોઈ મંથન માંડ્યું, મહી કે માખણ કોને કહું !

સફળ થવાના બે રસ્તા છે, સાચા ખોટા કોને કહું !

માનવમાં બે તત્વ છુપાયાં, દેવ કે દાનવ કોને કહું !

જીવનના સંઘર્ષે હાર્યો, નિતિ અનિતિ કોને કહું !

સમય સમયનું કામ કરે છે, યશ કે અપયશ કોને કહું !

કર્મના તાલે નાચે સહુ તો, કર્યું કારવ્યું કોને કહું !

કર્મ પ્રભાવે દુઃખ આવે તો, નિમિત્ત કે દોષી કોને કહું !

દ્વંદ્વ ચાલતું મન માંહે પણ, બુદ્ધિ સુબુદ્ધિ કોને કહું !

સંજોગોને વશ છે માનવ, દૈવી આસુરી કોને કહું !