કાગળિયાં કેટલાં લખું
કાગળિયાં કેટલાં લખું
કાગળિયા કેટલાં લખું તને, હવે આવવું હોય તો આવને !
કાલાવાલા કેટલાં કરું પછી, હવે હું પણ તો રિસાઈ જાઉંને !
આ આંખોની કીકીઓમાં, વસી ગયો છે તું ઓ વ્હાલા !
બસ દિલના આયનામાં હવે, બિંબિત થઈ ઉતરી આવને !
વિયોગ તારો અસહ્ય થયો મન મૂરજાય; આંખો છલકાય,
વિરહી રાતોમાં; બળતી આંખોમાં રાહત મળે, શમણું થૈને તો આવને !
ન તું ! ન તારો પત્ર એક આવ્યો, વિહ્વળ હૈયું રડે; છૂટી ગઈ હામ,
અમંગળની આશંકાઓ વચ્ચે, શ્રદ્ધાના દીપ શો સંદેશો તો મોકલાવને !
અરે ! હટો ! વામણા વિચારોની વણઝાર, હું નહિ ભ્રમિત થાઉં
ધબકતાં હૃદયમાં મારા, તારી હયાતીનો ધબકાર તો સંભળાવને !