કપાયેલી કેક

શેઠના જન્મદિવસ પહેલાં દીકરો એક કેક લાવ્યો,

પરંતુ પિતાને કેકનો ફ્લેવર પસંદ જ ન આવ્યો,

એ દિવસે એક અલગ જ કેક આવશે એવું બોલીને,

શેઠાણીએ પોતાનો રુતબો સૌની સામે જ જતાવ્યો,

લાચાર નોકરડીને કેક ફેંકી ને આવવા જણાવ્યું,

ગરીબ બાઈના મનમાં વિચાર અતિ ઉત્તમ આવ્યો,

અધકચરી થયેલી કેક પોતાની ઘરે લઈ આવી,

હોંશેહોંશે એ દિવસે જન્મદિવસ દીકરાનો મનાવ્યો,

મીણબત્તીઓનો મેળ તો ક્યાંયથી પડ્યો નહીં,

સુંદર મજાનો દીવડો કેકની નજીક પ્રગટાવ્યો,

ખોલીઓના બધાં છોકરા હાજર હતાં પાર્ટીમાં,

નાનો નાનો ટુકડો પેટમાં અમૃત પાક સમજી પધરાવ્યો.