કાનુડા હવે તો અવતરણ કર

દીધાં વચન ગીતા મહીં તું, પાળવા આવીશ ક્યારે ?

ચોપાસ આડંબર વધી ગ્યું, ખાળવા આવીશ ક્યારે ?

ઉર આવકારો ગ્યો રસાતળ, ભાવ ખોવાણો જગતથી,

ઊંડા કળણ છે સ્વાર્થના ભઇ ટાળવા આવીશ ક્યારે ? 

આંગણ થયાં ગૌરી વગરના ને યમુના આજ પ્રદૂષિત !

પાપો તણો અંબાર જગમાં, બાળવા આવીશ ક્યારે ?

શાણા બનીને શામળાના સ્નેહની વાતો કરે છે,

નફરત તણી આગે જલે જગ, ગાળવા આવીશ ક્યારે ?

'શ્રી' ઝંખતી, દિનરાત કાનુડા ! હવે તો અવતરણ કર !

છે યાચના મુજ ઉર તણી, તું ભાળવા આવીશ ક્યારે ?