જૂનાં પુસ્તકની વચ્ચે

ખીલવું ને મુરઝાવું

સદાય કંટકોની મધ્યે

ને છતાંયે

શ્વસું છું હજીયે

જૂનાં પુસ્તકની વચ્ચે !

એ પ્રિયતમના

ગુલાબી અધરનાં

સ્પર્શને ઝંખતું

પ્રીતને તરસતું,

જૂનાં પુસ્તકની વચ્ચે !

કોમળ કરકમળોમાં

મૃદુતાથી લઈને રાખ્યું'તું

પ્રેમની અમર નિશાની રૂપે

ધબકે છે એ પ્રીત રોમરોમમાં,

જૂનાં પુસ્તકની વચ્ચે !

સર્જન-વિસર્જન

છે કિસ્મતની લકીરોમાં

પ્રેમનું સ્મૃતિચિન્હ,

કોતરીયું'તું પાને-પાને

જૂનાં પુસ્તકની વચ્ચે !

“એ ગુલાબ સ્વરૂપે”

ભલે મુરઝાયું,પીંખાયું

એકલતાના રણમાં,પણ, હજીયે

હ્દય ધબકી રહ્યું છે,પ્રણયમાં,

જૂનાં પુસ્તકની વચ્ચે !