મારા શુભચિંતક
મારા શુભચિંતક
અથાગ મહેનતે શિખરે પહોંચી જોયું મે પાછળ ફરી
મારી પદ્છાપ સંગે ચાલતાં આ પદ્ચિહ્નો પાડ્યાં કોણે ?
ધન્ય મારું જીવન એ શુભચિંતક મારા શિક્ષક હતા !
થયું સ્મરણ એ પથરાળ પથનું જ્યાંથી શરૂઆત કરી
ત્યાં દિશાસૂચક ચિહ્નો પહેલેથી જ અંકિત કર્યા કોણે ?
ધન્ય મારું જીવન એ શુભચિંતક મારા શિક્ષક હતા !
માંહે પડેલાં અસીમ શક્યતાનાં બીજને ફૂટવું જ હતું
કલ્પતરુંને આભ આંબવાનાં ઓરતાને સિંચ્યા કોણે ?
ધન્ય મારું જીવન એ શુભચિંતક મારા શિક્ષક હતા !
પહોંચી શિખરે વિરુદ્ધ પવનોને નાથવાં સહેલા નથી
મહાન સંકલ્પોનું બળ આ કોમળ હૃદયને આપ્યું કોણે ?
ધન્ય મારું જીવન એ શુભચિંતક મારા શિક્ષક હતા !
અખંડ ;દીપાવલી' ઝગમગી મુજ બે નયનો મધ્યે જે
જ્ઞાનાંજન શલાખા આંજી અજ્ઞાન તિમિર નાથ્યાં કોણે ?
ધન્ય મારું જીવન એ શુભચિંતક મારા શિક્ષક હતા !