મારો મન પતંગ

સૂરજ સંગ લાગે હોડ એવી લાંબી જેની દોર,

ભરે ઉંચેરા આભે ઉડાન ઉંચી મારો મન પતંગ !   

ભરી ખિસ્સામાં વિશ્વાસ, દોર સંગ ચડે પરવાન,

સંગાથ દોર તણો સદાય ઝંખે મારો મન પતંગ !

હો સાથી દોર તો થનગનતો ઉડે ચૂમવા અંબર,

વ્યોમ રંગવાની રાખે હૈયે હામ મારો મન પતંગ !

અતરંગી, મનરંગી, ચંચળ, ચપળ, ભરે ઉડાન,

દોર થામે વ્હાલે, આભે રમતો મારો મન પતંગ !

'દીપાવલી' બંધન હો સ્નેહ પાયેલાં દોર સમા,

દ્રઢ સંકલ્પે હંફાવે વાયરાઓને મારો મન પતંગ !