હેં ને શિવજી

ભોળીયાના નામે દુનિયા ઠગે, હેં ને શિવજી,

ચાલે ભક્તિમાં કૌભાંડ આ જગે, હેં ને શિવજી,

ચડાવે છપ્પનભોગ રીઝવવા મહાદેવને સૌ,

ત્રિપુરારી રીઝે બિલ્વપત્ર ને સલિલે, હેં ને શિવજી,

ત્રિનેત્રધારી, પશુપતિનાથ શંભુ છે કૈલાસવાસી,

એ ભક્તોજનોનાં હૃદયમાં વસે, હેં ને શિવજી,

ભભૂત ચોળી, ભૂતોની ટોળી, વાધ્રચર્મધારી, 

એ તો ન કિનખાબી વાઘા પહેરે, હેં ને શિવજી,

નટરાજ રાજ, ઉમિયાપતિ, હે ! શશાંક ધારી,

સૃષ્ટિ કાજે હળાહળ વિષ ધર્યું કંઠે, હેં ને શિવજી,

ન ચાહું હીરા, માણેક કે સુવર્ણાલંકાર ગંગાધારી,

ભકિત તમારી કરું ભવોભવે, હેં ને શિવજી,

હો અંત સમયે તારું જ નામ સ્મરણ ઉમિયાપતિ,

ભક્ત ભોળા કર જોડી કરગરે, હેં ને શિવજી.