Library
Profile
હું, હું છું !
હું, હું છું !
મને જાતે ઊગ્યાનું થોડું ગુમાન રહેવા દો,
કશુંક ખાસ છે મુજમાં એ મને કહેવા દો !
હું, હું છું ને મને હું જ રહેવા દો !
બીજમાંથી બની છોડ હવે ખુદ વધવા દો,
કાપી ડાળખી મારી કલમ કરવી રહેવા દો !
હું, હું છું ને મને હું જ રહેવા દો !
હશે ખાસ રીત એમની મને શીખવાનું સહેવા દો,
હું છું ને એ પણ છે હવે તો સરખાવવું રહેવા દો !
હું, હું છું ને મને હું જ રહેવા દો !
સારાપણાના ઇલકાબો ભલે એમને પહેરવા દો,
છો રહ્યા સમંદર એ બધા, ઝરણું આ વહેવા દો,
હું, હું છું ને મને હું જ રહેવા દો !
ગમુ કે ના ગમુ પણ, જે સાચ છે એ મને કહેવા દો,
થોડી ખારાશ પણ જરૂરી છે આ સમંદરે રહેવા દો,
હું, હું છું ને મને હું જ રહેવા દો !
લાગણી વ્યક્ત કરું ના ભલે,અંતરમને વહેવા દો,
આંખોથી ના દીસે પણ હૃદયે એ ભાવ રહેવા દો !
હું, હું છું ને મને હું જ રહેવા દો !
જોઈ શકો ના ભલે મારી નજરે, મને નિરખવા દો,
તમ મૂલ્યાંકનોના ત્રાજવા ખોટવાળા જ રહેવા દો !
હું, હું છું ને મને હું જ રહેવા દો !
હશે દલીલો ધારદાર તમારી, મને મૌન જ રહેવા દો,
ક્યારેક કોઈ બિંદુ મારું તમારું એકસમાન રહેવા દો !
હું, હું છું ને મને હું જ રહેવા દો !
અનુકુળતાઓ ને તમારી પંપાળવી જરા રહેવા દો,
સમજણના સેતુઓ અવગણવા હવે તો રહેવા દો !
હું, હું છું ને મને હું જ રહેવા દો !
ગોઠવો સોગઠાં રમતનાં નિત અહીં મને હારવા દો,
જીતો પ્રશંસા બધી અહીં આલોચના આવવા દો !
હું, હું છું ને મને હું જ રહેવા દો !
મને જાતે ઊગ્યાનું થોડું ગુમાન રહેવા દો,
કશુંક ખાસ છે મુજમાં એ મને કહેવા દો !
હું, હું છું ને મને હું જ રહેવા દો !
