દરિયા દેવ

દરિયા દેવ…..રમેશ પટેલ(આકાશદીપ)

 

નાનાં  નાનાં  ભૂલકાઓની, એક  બનાવી  યાદી

જાનુ, ખુશી સાથે આવ્યાં દોડી, સલોની  ને આદી

રોહન  બોલે  પપ્પા અમારે, જોવી  છે  રે   હોડી

સાગર  તટે  રેતી  પટે, આજ  કરશું  રે  ઉજાણી

 

આવો  ભૂલકાં  બેસી  જાઓ, ઊપડે  આપણી ગાડી

આવી પહોંચ્યા દરિયા તટે, થઈ ગયાં સૌ રાજીરાજી

ભોળાં  ભૂલકાં, ભોળી  આંખે, ભાળે  દૂર  દૂર  વારિ

કિનારે ઊભા છબછબ કરતાં, કૂદાકૂદી  કરે મજાની

 

નાની નાની પવન ફરકડીઓ, લઈ આપી પપ્પાએ

સમીર  સપાટે  જોરથી ઘૂમે  ને  હૈયાં અમારાં ઝૂમે

ભીંની ભીંની રેતીમાં, પગ દબાવી જાનુ બનાવે ઘર

નાના નાના રેત મહેલથી ,રચ્યું  રૂડું  ચરણ નગર

 

માછલી    ઘરની    મજા  માણીએ, આવો   મારી   સાથે

નાની   મોટી  માછલીઓ   દીઠી,   રમતો   કરતી    સંગે

સલોની કહે, માછલીઓ તો એવી ભાગે, જાણે ચઢી છે જંગે

હે ભગવાન!   પાણીમાં   બેસી   તું   સૌને કેવી રીતે રંગે?

 

રાતી પીળી લાલ ભૂરી, માછલીઓના મનગમતા છે રંગ

ખુશી કહે, ખુશી ખુશી  જોયા કરીએ  એવા  એમના  ઢંગ

રમતાં  રમતાં  રેતીમાંથી  આદીને  મળિયો  મોટો  શંખ

શંખ  વગાડી,  આદીના  ગાલના રાતા  થઈ  ગયા રંગ

 

સંધ્યા  કાળે  હોડીમાં   અમે,  દરિયે   ઘૂમવા   નીકળ્યા

અફાટ સાગરે પવન સપાટે, મોજાં સંગે મનભરીને ડોલ્યા

શંખ  છીપલાં કોડા કોડીની, ભરી રોહન  આદીએ  ઝોળી

હસતાં રમતાં મજા માણી, ઘેર આવી અમારી નાની ટોળી

રમેશ પટેલ(આકાશદીપ)