నవ వధువు!

నేను పుట్టినప్పటి నుంచి 

నా అల్లరిని భరించిన వారు

నా తెలివిని మెచ్చుకున్న వారు 

మొదటిసారి నా అందం గురించి 

మాట్లాడటం మొదలుపెట్టారు

నా అణుకువను ఆనవాలుగా చూపెడుతున్నారు

గారాబం చేసిన కన్నవాళ్ళే

ఆంక్షలు విధిస్తూ...

జాగ్రత్తలు చెబుతున్నారు.

ఇన్నాళ్లు అందరికీ నచ్చిన నేను

ఇప్పుడు వేరే ఎవరికో నచ్చాలట

నా ప్రవర్తన తీరు మార్చుకోవాలట

మూడు ముళ్ళ బంధంతో...

నేను మరో ప్రపంచం చూడబోతున్నానట

మెట్టెల సవ్వడితో మెట్టినింటిని మెప్పించాలట

తలుచుకుంటే...

కొంచెం ఇష్టం కొంచెం కష్టం లా అనిపిస్తుంది

ఒంటరినై వెళ్ళి జంటగా మారి

మరో తరానికి నాందిగా సృష్టి ధర్మాన్ని పాటిస్తూ

అనాది కాలపు కట్టుబాట్లతో...ఇల్లాలిగా జీవించాలట

ఇన్నాళ్ల నా ఆనందాన్ని ఆకాంక్షలను నాలోనే దాచుకుని

నన్ను నేను మరోలా ఆవిష్కరించుకోవాలి

అందమైన పెళ్ళి కూతురుగా ముస్తాబవ్వాలి.

శ్రీ...