అమ్మ తోడు

ఒట్టేస్తూ అలవోకగ..పెట్టేవా అమ్మతోడు..!

చిన్ని దెబ్బ తగిలితేనె..తలచేవా అమ్మతోడు..!

పెదవివిప్పకుండ తాను..ప్రేమగగన మయ్యిందే..

పెరిగిపెద్ద కాగానే..మరచేవా అమ్మతోడు..! 

నీవెన్నో విజయాలను..పొందాలని దీవించెనె..

నేను-నాది ధ్యాసలోన..వదిలేవా అమ్మతోడు..! 

కన్నీరో మున్నేరో..కొంగుచాటు దాచిందే..

ఎన్నిపొరల చిక్కె మనసు..వీడేవా అమ్మతోడు..! 

మాయచేయ వేళలోన..తేనెలొలుకు నవ్వులెన్నొ .. 

మాటకు ముందే చక్కగ..పలికేవా అమ్మతోడు..!

గోర్వెచ్చని తన ఒడిలో..మురిసిన ఆ ఎఱుకేదీ.. 

ఇంత జ్వరం వస్తేమరి..కోరేవా అమ్మతోడు..!

అమ్మచేతి గోరుముద్ద..అమృతనిధే మాధవుడా..

"అమ్మా..అమ్మా..!"అంటే..అందేవా అమ్మతోడు..!