నేను నాది

తనివితీర వ్రాసుకున్న..ఉత్తరాన్ని చింపేశా..! 
బాధంతా ఒంపేయగ..నచ్చకనే మింగేశా..! 

వాడు నన్ను చేర రాడు..ఎప్పటికీ ఇదే నిజం.. 
పలు ఆశల గాలిపటం..సుడిగాలికి విసిరేశా..! 

హాయికి అర్థం చెప్పను..మాటలకేం తెలుస్తుంది.. 
అనుభవాల సుగంధాన్ని..మట్టికి కానుక చేసేశా..! 

పరదాలో ఓ కోకిల..విరహగీతి పాడుతోంది.. 
వసంతాన్ని తనకోసం..హృదిలోనే దాచేశా..! 

తెలిమబ్బే జాడలేదు..వానెప్పుడు వచ్చేనట.. 
ఎదురుచూపు వాకిట్లో..నా ప్రశ్నను పాతేశా..! 

'నేను-నాది' లేవన్నది..రుజువెలాగ పట్టాలో.. 
జన్మల గది తాళంచెవి..గాలింపే వదిలేశా..!