ଊର୍ଦ୍ଧ୍ବମୁଖ
ଊର୍ଦ୍ଧ୍ବମୁଖ
ଜନ୍ମ ନେବା ପରେ ଭୂମିର ଉପରେ
ପ୍ରଥମେ ପଡଇ ପାଦ
ଗୁରୁଣ୍ଡିବା ଶିଖି ସବୁ ଟିକିନିଖି
ଜାଣିବାକୁ କରୁ ବାଦ ।
ହୋଇଗଲେ ଠିଆ ମାରିବାକୁ ଡିଆଁ
କାହାର ନହୁଏ ଇଚ୍ଛା
ତେଣୁ ଜନ୍ମଦାତା ପିତା ଅବା ମାତା
ରହନ୍ତି ପିଲାଙ୍କ ପିଛା ।
ଆଗେ ବଢୁ ବଢୁ ପାଠଶାଠ ପଢୁ
ବିଦ୍ୟାଳୟେ ଧୀରେ ଧୀରେ
କେତେ ବୁଦ୍ଧି କାହୁଁ ପଶେ ଚାହୁଁ ଚାହୁଁ
ଆମରି ଉନ୍ନତ ଶିରେ ।
ଦକ୍ଷତାର ବଳେ ଊର୍ଦ୍ଧ୍ବେ ଯିଏ ଚଳେ
ନିଜ ସହଜାତ ଗୁଣେ
ଯଥାକାଳେ ଯଥା ପରାମର୍ଶ କଥା
ଧ୍ୟାନ ସହକାରେ ଶୁଣେ ।
ଊର୍ଦ୍ଧ୍ବେ ନାହିଁ ସୀମା ସୁରକ୍ଷାର ଜିମା
କେବେବି ଭୁଲିବା ନାହିଁ
ଵିକାଶର ଅର୍ଥେ ଅଗ୍ରଗତି ପଥେ
ବଢୁଥିବା ଦେଖି ଚାହିଁ ।
ବଞ୍ଚିବାକୁ ସୁଖେ ଗଲେ ଊର୍ଦ୍ଧ୍ବମୁଖେ
ରହିଥିବା ମର୍ତ୍ତ୍ୟ ପୁରେ
ଆକାଶକୁ ମାପି ପାରିବାନି ବ୍ୟାପି
ରହିଛି ଅନନ୍ତ ଦୂରେ ।
ତିଳେ ନାହିଁ ମନା ଯେତେ ଦୂର ଅନା
ଯୋଜନା ନହେଉ ପଣ୍ଡ
ନିଜ ମୂଳସ୍ଥିତି ଭୁଲିଗଲେ ଭୀତି
ଭୋଗିବାକୁ ହେବ ଦଣ୍ଡ ।