ଅପ୍ରେଲ ପହିଲା

ମଥା ଘଷି ଘଷି      ଭାବୁଥିଲି ବସି

କିଏ ଦେଇଗଲା ଧୋକା

ଦେହ ହାତ ମାଜି    ଯାଇନି ତ ସାଜି

ଅପ୍ରେଲ ମାସିଆ ବୋକା !

ଆଉ ଦୀପ ଜାଳି    ବଜାଅନି ଥାଳି

ବରଷେ ଗଲାଣି ବିତି

କରୋନା ଭୂତାଣୁ   କରିଦେଲା ସ୍ଥାଣୁ

ପାରିଛି ବା କିଏ ଜିତି ?

ଆତ୍ମ ନିର୍ଯ୍ୟାସରେ   ଅନ୍ଧ ବିଶ୍ବାସରେ

ଆଶା ରଖି ଅପ୍ରମିତ

ପ୍ରତିଦିନ ଥୋକେ  ଅମାନିଆ ଲୋକେ

ହେଉଥିଲେ ସଂକ୍ରମିତ ।

ଉଜାଡ଼ି ଜୀବିକା     ଛିଡ଼ିଗଲା ଶିକା

ଆଉ କା' କପାଳେ ଯାଇ

ଖଟୁଥିଲା ଯିଏ      ସର୍ବସ୍ୱାନ୍ତ ସିଏ

ମାଲିକଠୁ ତଡ଼ା ଖାଇ ।

ଏବେ ପିଶାଚୁଣୀ    ବ୍ୟାପିଅଛି ପୁଣି

ଅତି ଭୟାବହ ବେଶେ

ପାଇ ଅବକାଶ    ହେଲାଣି ପ୍ରକାଶ

ଆତଙ୍କ ଖେଳାଇ ଦେଶେ ।

ଏ ଯେଉଁ କିସମ     ଅଧିକ ବିଷମ

ବେଗରେ ପାରୁଛି ଭାସି

ପ୍ରଭାବେ ଯାହାର    ଦିଏ ଇସ୍ତାହାର

ଅପ୍ରେଲ ପୁନଶ୍ଚ ଆସି ।

ପାଞ୍ଚଗୋଟି ପାଞ୍ଚ     କରୁକରୁ ଯାଞ୍ଚ

ମିଳିଯାଏ ଯେଉଁ ଶିକ୍ଷା

ମୋର ଅନୁରୋଧ    କରିନିଅ ବୋଧ

ସମସ୍ତଙ୍କୁ ଦେଇ ଦୀକ୍ଷା ।