ସାହାହେଉ ସଦା ମୋତେ

ମାଆ ବୋଲି ତୋତେ ଡାକିଦେଲେ ଥରେ

ଭରସା ଆସଇ କେତେ ,

ତୁଟିଯାଏ ମନୁ ଆଶଙ୍କା ଯେତେକ

ସାହାହେଉ ସଦା ମୋତେ ।

ମମତାମୟୀ ତୁ କଲ୍ୟାଣମୟୀ ଗୋ

ଅନୁଭବ କରେ ନିତି ,

ଭକତି ଭାବରେ ଦୀପଜାଳି ତେଣୁ

ଗାଏ ଆବାହନୀ ଗୀତି ।

ଶରଧାରେ ପଦେ କୁସୁମ ଅରପି

ତୁମ ଛବି ଧ୍ୟାୟେ ଚିତ୍ତେ ,

ତୁମ କରୁଣାରୁ ସକୁଶଳେ ମୋର

ସାରା ଦିବସଟି ବିତେ ।

କେତେ ସଂକଟରୁ ଉଦ୍ଧରି ରଖିଛ

ମନେ ରଖିଅଛି ସବୁ ,

ମାଆ ଗୋ,ତୁମରି ଆଶିଷ ବଳରେ

ଆମେ ଦିବ୍ୟାନନ୍ଦ ଲଭୁ ।

ସବୁଦିନ ଏଇ କୃପା କରିଥାଅ

ପଦେ ରହିଥାଉ ଶ୍ରଦ୍ଧା ,

ତୁଟିଯାଉ ଯେତେ ଆଶଙ୍କା ମନରୁ

ଦୂରହେଉ ସବୁ ବାଧା ।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।