ଯିବ ସର୍ବନାଶ ଗ୍ରାସି
ଯିବ ସର୍ବନାଶ ଗ୍ରାସି
ତାଳବଣେ ଘାସ ଚରୁଥିଲା ଏକା
ବିଚରା ଠେକୁଆ ଛୁଆ
ପକ୍ବ ତାଳ ଖସି ପଡିଲା ଦୈବାତ
ହେଲା ସିଏ ଆବାକାବା ।
ତଳେ ପଡିଥିଲା ଶୁଖିଲା ବରଡା
ଉପରେ ପଡିଲା ତାଳ
ଶୁଭିଲା ଅଧିକ ପତନର ଶବ୍ଦ
ଠେକୁଆଟି ଅସମ୍ଭାଳ ।
ଭାବି ଭୂମିକମ୍ପ ହେଲା ଭୟଭୀତ
ଧାଇଁଲା ପ୍ରାଣ ବିକଳେ
ଦେଖିଲା ତାହାକୁ ବାଟରେ ଯିଏ ବି
କାରଣ କିସ ପଚାରେ ।
ହୋଇ ଅଣଶ୍ବାସୀ କହେ ଧାଉଁ ଧାଉଁ
ଠେକୁଆ ତରାଟି ଆଖି
ହୁଏ ଭୂମିକମ୍ପ ଫାଟି ପଡେ ପୃଥ୍ବୀ
ବଞ୍ଚିବାକୁ ଦଉଡୁଛି ।
ସତ ମଣି ତାକୁ ପଛେପଛେ ତାର
ଜୀବଜନ୍ତୁ ଜଙ୍ଗଲର
ପ୍ରାଣ ବିକଳରେ ଧାଇଁଲେ ସମସ୍ତେ
ପଡିଗଲା ହାହାକାର ।
ନିରେଖି ଏ ଦୃଶ୍ଯ ହୋଇ ଆଚମ୍ବିତ
ପଶୁରାଜ ମହାବଳ
ଉଭା ହୋଇ ଅଗ୍ରେ କରିଲା ଗର୍ଜନ
ପଶୁଦଳ ଥରହର ।
ସବୁ ବୁଝିଶୁଣି ଅସଲ କାହାଣୀ
ସିଂହ କହେ ସାଥେ ଚାଲ
କେଉଁଠି ହୋଇଲା ବଡ ଭୂମିକମ୍ପ
ଦେଖିନେବା ଅଟେ ଭଲ ।
ସିଂହର ସହିତ ଚାଲିଲା ଠେକୁଆ
ଭୟଭୀତ ପଶୁଗଣ
ନିରୂପିତ ସ୍ଥାନେ ପାଇଲେ ପଡିଛି
ପାଚିଲା ତାଳ ପ୍ରମାଣ ।
ମରିଥାନ୍ତେ ବୁଡି ଗଭୀର ସାଗରେ
ଜଙ୍ଗଲର ଜୀବଜନ୍ତୁ
ସିଂହର ଉଦ୍ଯମ ଯୋଗୁ ବଞ୍ଚିଗଲେ
ଏତ ଗଳ୍ପ କଥାବସ୍ତୁ ।
କଥା ଆଉ କାମ ହୁଏ ଭିନ୍ନ ଭିନ୍ନ
ବୁଝି ବି ଲୋକେ ଅବୁଝା
ଖଟାଇବ କିଏ ବୁଦ୍ଧି କଉଶଳ
ଉଠାଇବା ଭଲ ମଜା ।
ମାଗଣା ଏ ଯୁଗେ ସଭିଏଁ କୁଣ୍ଠିତ
କରିବାକୁ ପରିଶ୍ରମ
ଧାଆଁନ୍ତି ଲୋଭରେ ପାଇବାକୁ ପୁଳେ
କେଉଁଠୁ ମିଳିବ ଧନ ।
ଜୋତା ଛତା ଜାମା ଗାମୁଛା ଚଷମା
ଚାଉଳ ଗହମ ଡାଲି
ଫଳେ ନାହିଁ ଶୂନ୍ଯେ ଜାଣନ୍ତି ସମସ୍ତେ
ଲାଗଇ କିନ୍ତୁ ଗହଳୀ ।
ବଢେ ଜମାପୁଞ୍ଜି ସଢେ ମଧ୍ଯବିତ୍ତ
ହତାଶ ଶ୍ରମିକ ଚାଷୀ
ନ୍ଯାୟ ପ୍ରଶାସନ ନ ହେଲେ ସୁଦୃଢ
ସର୍ବନାଶ ଯିବ ଗ୍ରାସି ।