ବୁଲୁଥିଲେ ଗାଆଁ ସାରା

ମୁହଁକୁ ଫୁଲାଇ ରହନା ତୁ ଆଉ

ମାଳତୀ ଲୋ ଚାହାଁ ମୋତେ ,

ଅଧ୍ୟାପିକା ଗୋଟେ ହୋଇଗଲି ବୋଲି

ପାସୋରିନି ଜମା ତୋତେ ।

ମିଛରେ ତୁ ଯାହା ଅଭିମାନ ବହି

ଦୋଷାରୋପ କରୁ ସିନା ,

ତୋ କଥା ସେଇଠି ମନେ ପଡ଼ୁଥିଲା

ମିଛ କହୁ ନାହିଁ ଜମା ।

ତୁହି ପରା ମୋର ବାଲ୍ୟସଙ୍ଗିନୀ ଲୋ

ସଭିଙ୍କଠୁ ପ୍ରିୟ ଅତି ,

କେତେ ହସ ,ଖୁସି ,ଦୁଃଖ,ସୁଖରେ ଲୋ

ସମୟ ଯାଇଛି ବିତି ।

ମନେପଡ଼େ ଭାରି-ସାଙ୍ଗ ହୋଇ ଦୁହେଁ

ବୁଲୁଥିଲେ ଗାଆଁ ସାରା ,

ଖାଉଥିଲେ ଆମ୍ବ,ପିଜୁଳି ଚୋରେଇ

ସାଧୁଆ ବାଡ଼ିରୁ ପରା !!

ରଜ ଦୋଳି ଆମେ ଖେଳୁଥିଲେ ମିଶି

ଗାଇ ନାନା ରଙ୍ଗେ ଗୀତ ,

ପଉଷ ମାସରେ ନିଆଁ ପୋଉଁଥିଲେ

ଆସୁଥିଲା ଯେବେ ଶୀତ ।

ପୋଖରୀରେ ଆମେ ପହଁରି ପହଁରି

ତୋଳୁଥିଲେ କେତେ କଇଁ ,

ପଢ଼ି ଯାଉଥିଲେ ସାଥୀ ହୋଇକି ବି

ସେସବୁ କି ମନେ ନାଇଁ !!

ତୁମ ଘରେ କିଛି ସମସ୍ୟା ହେବାରୁ

ଅଧାରୁ ଛାଡ଼ିଲୁ ପାଠ ,

ଗାଆଁ ଝିଅ ପୁଣି ଗାଆଁ ବୋହୂ ସାଜି

ଧରିଲୁ ଶୁଶାନ୍ତ ହାତ ।

ବାହାରକୁ ଗଲି ଉଚ୍ଚ ଶିକ୍ଷା ଲାଗି

ପଢ଼ି ହେଲି ଅଧ୍ୟାପିକା ,

ସେଦିନ ତ ଭାରି ଖୁସି ହେଉଥିଲୁ

ଆଜି କିଆଁ ମୁହଁ ଫିକା !!

କୁନି ଝିଅ ତୋର ପଢ଼ି ଗଲାଣି ପା'

କେମିତି ଅଛି ସେ 'ଲୁସି' ,

ମନ ଖୋଲି ଆ' ଆ..କଥା ହେବା ଟିକେ

ସେଇ ଗଛମୂଳେ ବସି ।