ଲାଇବ୍ରେରୀ
ପ୍ରୋଫାଇଲ୍
ମା ଆସିଲେ
ମା ଆସିଲେ
ଦାଣ୍ଡ ଦୁଲୁକାଇ ମାଆ ମୋ ଆସିଲେ
ବାଜିଲା ନାଗରା ବାଜା
ଚଉଦିଗ ଦେଖ ଦିଶେ କେଡେ ତୋରା
ତୋରଣ ହୋଇଛି ସଜା ।୧।
ଘଣ୍ଟ ଘଣ୍ଟା ବୀର କାହାଳୀ ବାଜିଲା
ହେଲା କେତେ ପଟୁଆର
ଆସୁରୀ ଶକତି ହେଲେ ଛଟପଟ
ହୋଇବ ତାଙ୍କ ସଂହାର ।୨।
ସାଧକ ଭକତ ହେଲେ ଆନନ୍ଦିତ
ଲଭି ତାଙ୍କ ଦରଶନ
ଅତି ଯତନରେ ସେବାରେ ଲାଗିଲେ
ପୁଲକିତ ତନୁ ମନ ।୩।
ମାଆ ହିଁ ଶକତି ମାଆ ହିଁ ଭକତି
ମାଆ ହିଁ ମୁକତି ଦାତ୍ରୀ
ମାଆ ପାଦ ତଳେ ମନ ଧ୍ୟାନ ରଖି
ମାଆଙ୍କୁ କରନ୍ତି ସ୍ତୁତି ।୪।
ମହିଷାମର୍ଦ୍ଦିନୀ ଦୁର୍ଗତିନାଶିନୀ
ଦୁଃଖ ହରି ଦେଲେ ସୁଖ
ତାଙ୍କରି ଶରଣ ଆସିବା ପାଇଁକି
ଲଗାଅ ବୁଦ୍ଧି ବିବେକ ।୫।
ସଙ୍କଟହାରିଣୀ ଦୁଷ୍ଟ ନିବାରିଣୀ
ମାଆ ମୋ ମମତାମୟୀ
କାଳେ କାଳେ ମାଆ ସନ୍ତାନର ଦୁଃଖ
କେବେ ନପାରନ୍ତି ସହି ।୬।
ବରଷେ ବରଷେ ଆସି ମା ହରଷେ
ସଭିଙ୍କୁ ସୁଖ ବାଣ୍ଟନ୍ତି
ଦୁଷ୍ଟ ବିନାଶନ ପାଇଁ ସିନା ନିଜେ
ଧରାରେ ଅବତରନ୍ତି ।୭।
ସୁଜନଗଣଙ୍କୁ ଆଶିଷ ଦିଅନ୍ତି
କୃପା ବହି କୃପାମୟୀ
ତାଙ୍କ ଦରଶନ ଲଭିବାକୁ ଭକ୍ତ
ମନ ହୁଏ ହାଇଁ ପାଇଁ ।୮।
କରୁଣା ମୂରତି ଜନନୀ ମୋହର
ଏହି କୃପା ତୋର ଥାଉ ।
ତୋର ନାମ ଗାଇ ତୁଣ୍ଡରେ ମୋ ସଦା
ଏ ଜୀବନ ମୋର ଯାଉ ।୯।
