ଦୀପାବଳି

ସରସ ସୁନ୍ଦର ଜୀବନକୁ ଆମ

କରଇ ପର୍ବ ପର୍ବାଣି ।

ନବ ଉନ୍ମାଦନା ନବ ଉଦ୍ଦୀପନା

ଦିଅଇ ଆମକୁ ଆଣି ॥

ବାରମାସେ ତେର ପରବ ଆମର

ତନ୍ମଧ୍ୟରେ ଦୀପାବଳି ।

ଆଲୋକର ପର୍ବ କାର୍ତ୍ତିକ ମାସରେ

ଆସଇ ଆଲୋକ ଜାଳି ॥

କାର୍ତ୍ତିକ ମାସର କୃଷ୍ଣ ଅମାବାସ୍ୟା

ଦିନ ଦୀପାବଳି ପର୍ବ ।

ପାଳନ୍ତି ସଭିଏଁ ଦେବ ଋଷି ପିତୃ

ପୂଜନେ ଏହି ପରବ ॥

ଗୃହ ପରିଷ୍କାର ଆଗୁଁ ହୋଇଥାଏ

ଦୀପାବଳି ପର୍ବ ଦିନ ।

ସନ୍ଧ୍ୟା ସମୟରେ ଘର ଅଗଣାରେ

ହୁଏ ପୂପ ଦୀପଦାନ ॥

ଦଶ ବିଶ୍ବେଦେବା ସପ୍ତଋଷି ତଥା

ଦ୍ଵାଦଶ ପିତରଗଣ ।

ଆବାହନ କରି ପୂଜନ ହୁଅଇ

ପଞ୍ଚ ଉପଚାରେ ଜାଣ ॥

ଘୃତ ଦୀପଦାନ ପରେ ହୋଇଥାଏ

ପୂପ ଦୀପଦାନ ତହିଁ ।

ଦୀପଦାନ ଶ୍ରାଦ୍ଧେ ନୈବେଦ୍ୟ ନହୋଇ

ସମର୍ପଣ ହୋଇଥାଇ ॥

ଶ୍ରାଦ୍ଧୀୟ ଦରବ ଫଳମୂଳ ଲିଆ

କଉଡି ବାଳୁଙ୍ଗାଧାନ ।

ଶୁଆଁଲଇ ସହ ହୁଏ ସମର୍ପଣ

ଏହା ଶାସ୍ତ୍ରର ବିଧାନ  ॥

କାଉଁରିଆ ହୁଳା ଲଗାଇ ଶେଷରେ

ବଡବଡିଆଙ୍କୁ ଡାକି ।

ବିଦାୟ ଦିଅନ୍ତି ବଡବଡିଆଙ୍କୁ

ଆଲୋକ ହୁଳାକୁ ଟେକି ॥

ପିଠାପଣାର ଭାଇଚାରାର ପର୍ବ

ଏ ଦୀପାବଳି ଆମର ।

ସୁନ୍ଦର ଆଲୋକର ସମ୍ଭାର ହୁଏ

ଚମକେ ଘର ଦୁଆର ॥

ଶ୍ରୀରାମ ଅଯୋଧ୍ୟା ଫେରିଲେ ତ୍ରେତାରେ

ରାବଣ ଦୈତ୍ଯ ସଂହାରି ।

ଦୀପାବଳିଦିନ ସେଦିନୁ ଏ ପର୍ବ

ପାଳୁଛନ୍ତି ନରନାରୀ ॥

ଶ୍ୟାମାକାଳୀ ପୂଜା ଦୀପାବଳିଦିନ

ହୋଇଥାଏ ଅନୁଷ୍ଠିତ ।

ଦୀପାବଳି ଆମ ଆଲୋକର ପର୍ବ

ପରମ୍ପରା ତା ମହତ ॥