ଆଶା-ଗୋଲାପ

ନିକୁଞ୍ଜ କାନନ ହୃଦ ବୃନ୍ଦାବନ

ପ୍ରେମ ସୁବାସିତ ପୁଷ୍ପ

ମାନସୀ ଶ୍ରୀରାଧା ହୁଅଇ ବାତୁଳୀ

ଚହଟେ ଆଶା ଗୋଲାପ ।

କରଇ ଉଚ୍ଚାଟ ମୂରଲୀର ସ୍ୱନ

ପଞ୍ଚମେ ଗାଏ କୋକିଳ

ବହେ ମୃଦୁମନ୍ଦ ମଳୟ ସମୀର

ଉଛୁଳେ ଯମୁନା ନୀଳ ।

ତୁମେ ପ୍ରାଣଧନ କଦମ୍ବ ସୁମନ

କେଶବ ମଧୁସୂଦନ

ଆସ କେଳିକୁଞ୍ଜେ ନ କରି ବିଳମ୍ବ

ହୁଅଇ ମନ ଉଚ୍ଛନ୍ନ ।

ବୃନ୍ଦାବନ ଚନ୍ଦ୍ର ଲୀଳାମୟ କୃଷ୍ଣ

ବିରାଜ ସତ୍ୟ ସୁନ୍ଦର

ସବୁଜ ସ୍ୱପନେ ତଲ୍ଲୀନ ମଗନ

ରାସେ କର ଅଭିସାର ।

ଜୀବନେ ସଞ୍ଚରୁ ଅମୃତ ନିର୍ଯ୍ୟାସ

ମଧୁମୟ ପ୍ରୀତିପ୍ରେମ

ସୁମଧୁର ତୁମ ରୂପ ସନ୍ଦର୍ଶନେ

ଆଶା ହେଉ ପୂର୍ଣ୍ଣକାମ ।