କୃଷକ ବେଦନା

ପାଞ୍ଚ ଏକରିଆ କୃଷକ ଜଣେ ମୁଁ ମନର ବେଦନା କହୁଛି 

ଚାଷ କଥା ଏବେ ଭାବିଦେଲା ବେଳେ ହୋସ ମୋ ଉଡ଼ିଯାଉଛି |

ମାଟିମାଆର ମୁଁ ଶ୍ରେଷ୍ଠ ସନ୍ତାନ ମାଟିର ମଣିଷ ହୋଇଛି 

ମୁଣ୍ଡ ଝାଳ ତୁଣ୍ଡେ ମାରି ଲୁହ ଲହୁ ଏକାକାର କରି ଦେଇଛି |

ହିସାବ କରିଲେ ଆୟ ଠାରୁ ମୋର ବ୍ୟୟ ତ ଅଧିକ ହେଉଛି 

ଅଭାବରେ ସଢ଼ି ସାହୁକାରଠାରୁ ବ୍ୟାଙ୍କ ପର୍ଯ୍ୟନ୍ତ ଧାଉଁଛି |

ମୂଳ କି ଶୁଝିବି ସୁଧ ବାବଦକୁ ପ୍ରତି ବର୍ଷ ବିଲ ବିକୁଛି 

ଝିଅ ତ ପଢ଼ିବା ଦୂରେ ଥାଉ ପୁଅ ଅଧାରୁ ପାଠକୁ ଛାଡ଼ୁଛି |

ବାଧକା ପଡ଼ିଲେ ଅଉଷଧ ନାହିଁ ଦିଅଁ ଦେବତାଙ୍କୁ ପୂଜୁଛି 

ଯାହା ଥିଲା ଥିଲା ଏବେ ଚାଷ କାମ ବ୍ୟାଧି ସମ ବୋଧ ହେଉଛି |

ବିଲ କାମ ପାଇଁ ମୂଲିଆ ଅଭାବ ଏକା ଏକା ଖଟି ମରୁଛି 

ଟଙ୍କିକା ଚାଉଳ ପାଞ୍ଚଟଙ୍କି ଅନ୍ନ ଚାଷକୁ ବୁଡ଼ାଇ ଦେଉଛି |

କାଳିଆ କିଷାନ ଯୋଜନା ଅର୍ଥକୁ ଅଣଚାଷୀ ଖାଇଯାଉଛି 

କିଏ ସେ ପ୍ରକୃତ ଚାଷୀ ବୋଲି ହାୟ ଏ ଯାଏଁ ଚିହ୍ନଟ ନୋହୁଛି |

ଗରିବ ପାଇଁକି ସକଳ ଯୋଜନା ମଧ୍ୟବିତ୍ତ ଭାସି ଯାଉଛି 

ତଳ ସୁଧୁରୁଛି ଉପର ହସୁଛି ମଝିଵାଲା ଦୁଃଖ ପାଉଛି |

ବଡ଼ଚାଷୀ ହୋଇ ଫସିଗଲି ମୁହିଁ ଦୀର୍ଘଶ୍ୱାସ ଖାଲି ଛାଡ଼ୁଛି 

ନାହିଁ ମୋ ଆଧାର ଶ୍ରମଜୀବୀ କାର୍ଡ ନିରାଶେ ଶୂନ୍ୟକୁ ଚାହୁଁଛି |

ଇନ୍ଦିରା ଆବାସ ବିଜୁ ପକ୍କାଘର ମୋ ପାଇଁ ସପନ ହୋଇଛି 

ଘର ଖଣ୍ଡି ମୋର ଭୁଶୁଡ଼ି ଗଲଣି ଛପର ତ ଉଡ଼ି ଯାଇଛି |

ଅଧେ ବିଲ ମୋର ପଡ଼ିଆ ପଡ଼ିଛି ଭାଗ ଚାଷୀ ମିଳୁ ନାହାନ୍ତି 

ଚାଷରୁ ବିମୁଖ ଆଜିର ଯୁବକ ଦାଦନ କାମରେ ଧାଆଁନ୍ତି |

କୃଷିରେ ମଜୁରୀ ବଢ଼ି ବଢ଼ି ଚାଲେ ବେଳୁ ବେଳ ମୁଣ୍ଡ ବିନ୍ଧୁଛି 

ଦ୍ୱିଘଣ୍ଟା କାମକୁ ତିନିଶହ ଟଙ୍କା ହାଡ଼େ ହାଡ଼େ ଗଣି ଦେଉଛି |

ଯେତିକି ଖରଚ କରୁଛି ତାହାର ଏକ ତୃତୀୟାଂଶ ମିଳୁଛି 

କରଜର ଭାର ବଢ଼ି ବଢ଼ି ଚାଲେ କ'ଣ କରିବି ଭାବୁଛି |

ଝିଅ ବିଭା ହେବ ପୁଅ ତ ପଢ଼ିବ ଘର ମରାମତି ଚାହୁଁଛି 

କାଣି କଉଡିଏ ହାତରେ ନାହିଁ ମୁଁ ଆକାଶ କୁସୁମ ତୋଳୁଛି |

ଯେତିକି ପାରିବି ସେତିକି କରିବି ମଜୁରୀ ଲାଗିବି ଏଣିକି 

ମୂଲ ନମିଳିଲେ ଛାଡ଼ି ଭିଟାମାଟି ଦାଦନରେ ଯିବି ଯେଣିକି |

ବିଲ ବିକି ଦେବି କରଜ ଶୁଝିବି ନାମ ମାତ୍ର ଚାଷୀ ହେବିଟି 

ବିପିଏଲ ହେବି ଚାଉଳ ପାଇବି କରିବିନି ଭିଡ଼ ପାଇଟି |

ଘର ପାଇଖାନା ବିଜୁଳି ଆଲୁଅ ଶ୍ରମିକ କାର୍ଡ ପାଇକି 

ଚିନ୍ତା ରହିବନି ଝିଅ ବାହାଘର ପୁଅ ପାଠ ପଢ଼ା ପାଇଁକି |

ଖଟି ଖଟି ମୋର ଅଣ୍ଟା ପିଠି ବାତ ଅୟସ କରିବି ଏଣିକି 

ଗରିବ ହୋଇକି ସବୁ ସରକାରୀ ସୁବିଧା ଆଣିବି ଟାଣିକି |

ଏ ମୋର ବିଚାର ଆଜି ମୁଁ ନାଚାର ପାରୁନାହିଁ ଧୈର୍ଯ୍ୟ ଧରିକି 

ପ୍ରଭୁ ଜଗନ୍ନାଥ ଡାକେ ଏ ଅନାଥ ମନସ୍କାମ ଯାଉ ପୂରିକି |