ବକ ପଞ୍ଚୁକ
ବକ ପଞ୍ଚୁକ
ସୁଧାର ସେ ପକ୍ଷୀ ଏକ ଧୋବ ଫରଫର l
ଚୁରୁକି ମଥା ବାବାଜୀ ବଗ ନାମ ତାର ll
ମହାଭାରତରେ ଶୁଣି ଥିବ ଉପାଖ୍ୟାନ l
ଧର୍ମ ବକ ପୁଛି ଥିଲା ଚାରୋଟି ପ୍ରଶନ ll
ଯୁଧିଷ୍ଠିର ଯଥାର୍ଥରେ ସେ ଉତ୍ତର ଦେଇ l
ଧର୍ମବଳେ ଫେରିପାଇଥିଲେ ମୃତ ଭାଇ ll
ରାମାୟଣେ ଅଛି ଏକ ବକର କାହାଣୀ l
ସୀତା ଅନ୍ୱେଷଣେ ବୁଲୁଥିଲେ ଭାଇ ବେନି ll
ରାବଣ ଯେକାଳେ ନେଲା ଜାନକୀ ଚୋରାଇ l
ବକ ଏକ ଦେଖି ଥିଲା ବୃକ୍ଷ ପରେ ଥାଇ ll
ସେ ବକ ସାକ୍ଷାତ କରି ଶ୍ରୀରାମ ଲକ୍ଷ୍ମଣ l
ଜାଣିଲେ ସୀତା ହରିଛି ଲଙ୍କାର ରାବଣ ll
ଆନନ୍ଦେ କହିଲେ ପ୍ରଭୁ କରୁଣାର ସିନ୍ଧୁ l
ଧାତାଦେଲା ଭାଗ୍ୟେ ବକ ତୁମପରି ବନ୍ଧୁ ll
ହେ ବକ ମହାତ୍ମା ମାଗିନିଅ ଇଚ୍ଛା ବର l
ତୁମ୍ଭଙ୍କୁ ଅଦେୟ ନାହିଁ କିଛିଟି ମୋହର ll
ବକ ଶ୍ରୀରାମେ ମାଗିଲା ତହୁଁ ହାତଯୋଡ଼ି l
ଵର୍ଷା ଚାତୁର୍ମାସ୍ୟେ ଯେବେ ଲାଗିଥିବ ଝଡ଼ି ll
ବର ଦିଅ ଖୋଜିବାକୁ ଯିବି ନାହିଁ ମୀନ l
ବସାରେ ବସିକି ମୋତେ ମିଳିବ ଭୋଜନ ll
ଶ୍ରୀରାମ ବୋଇଲେ ବକ ଦେଲି ସେହି ବର l
ଏକାଳେ ଭୋଜନ ଦେବ ପତ୍ନୀ ଆଣି ତୋର ll
ବକ ବୋଲେ ପ୍ରଭୁ ଏହା ଅଟେ କି ଉଚିତ l
କେମନ୍ତେ ଭକ୍ଷିବି ମୁହିଁ ପତ୍ନୀର ଉଚ୍ଛିଷ୍ଟ ll
ଶ୍ରୀରାମ ବୋଇଲେ ବକ ଛାଡ଼ ଏହି ଚିନ୍ତା l
ପତି ପତ୍ନୀ ଭିନ୍ନ ନୁହେଁ ଅଟେ ଏକ ଆତ୍ମା ll
ଏ ହୋଇବ ଖ୍ୟାତ ବକ ଚାତୁର୍ମାସ୍ୟା ବ୍ରତ l
ଏହାର ଫଳ ପ୍ରାଣୀଙ୍କୁ ହୋଇବ ପ୍ରାପତ ll
ପୂଣ୍ୟ କାର୍ତ୍ତିକରେ ବ୍ରତ ପାଳି ଯେଉଁ ଜନ l
ପଞ୍ଚୁକ କରିବ ତେଜି ଆମିଷ ଭୋଜନ ll
ପାଞ୍ଚ ଦିନ ଜଗତରେ ହୋଇବ ବିଖ୍ୟାତ l
ବକ ପଞ୍ଚୁକ ନାମରେ ସର୍ବତ୍ର ବିଦିତ ll
ପଞ୍ଚୁକ ପାଞ୍ଚଟି ଦିନ ଅତି ପୁଣ୍ୟ ଦାୟୀ l
ଆମିଷ ଭୋଜି ବଗ ବି ତାହା ପାଳୁଥାଇ ll
କାର୍ତ୍ତିକରେ ଦେଖ ବକ ହୋଇ ମାଳମାଳ l
ବଗ ଗହନେ ବସନ୍ତି ନୀରବ ନିଶ୍ଚଳ ll
ସର୍ବଦା ଆମିଷ ଭୋଜି ଛାଡ଼ିଅଛି ମୀନ l
ପଞ୍ଚୁକ ପାଳୁଛି କରି ପରଂବ୍ରହ୍ମେ ଧ୍ୟାନ ll