ଜାର ପ୍ରେମ

ତୁଳସୀ ପରି ସେ ଦୁଇ ପତରରୁ ବାସୁଥିଲେ ମହମହ 

ରୂପେ ଗୁଣେ ଜ୍ଞାନେ ଶ୍ରମ ସଂସାଧନେ ବିଚକ୍ଷଣ ବଳବହ |

ଛାତ୍ର ଜୀବନରୁ ଅରଜିଲେ ଯଶ ପର ଉପକାରେ ଚିତ୍ତ 

ଦୀନ ଆର୍ତ୍ତୀ ଭୋକି ଦୁଃଖ ହରଣରେ ଅକୁଣ୍ଠରେ ସାରି ବିତ୍ତ |

ଦୀପଶିଖା ପରି ନିଜେ ଜଳି ଜଳି ଅପରେ ଆଲୋକ ଦେଇ 

ଚାକିରୀ କ୍ଷେତ୍ରରେ ସାଧୁତା ପଣରେ କୀର୍ତ୍ତି କେତନ ଉଡ଼େଇ |

ଭଲ ପାଇ ଜଣେ ବରବର୍ଣ୍ଣିନୀର ସାଦରେ ଧରିଲେ କର 

ସୁଖେ ଆରମ୍ଭିଲେ ସୁନାର ସଂସାର ହସି ଉଠୁଥିଲା ଘର |

ଏକ ପୁତ୍ର ଏକ ସୁତା ହେଲେ ଜାତ ବିଧାତାଙ୍କ ବରଦାନ 

ସହସା ଆସିଲା ଜୀବନରେ ଝଡ଼ ସୁଖ ଶାନ୍ତି ଅବସାନ |

ଘଟଣାକ୍ରମରେ ସଂସାର ମଧ୍ୟରେ ତୃତୀୟ ପୁରୁଷ ପଶି 

ଶାନ୍ତି ତପୋବନ କଲା ଶମଶାନ ପତ୍ନୀ ଗଲା ପ୍ରେମେ ଫସି |

ବିଶ୍ୱାସରେ ବିଷ ଭରିଲା ପାପିଷ୍ଠ ଚାଲିଲା ଚୋରା ପୀରତି 

ପତ୍ନୀ ଆଚରଣ ଚରିତ୍ର ଦୂଷଣ ଛାତିକୁ ଦିଏ କରତି |

ଉପପତି ପ୍ରେମ ବାରଣେ ଅକ୍ଷମ ପତି ହେଲେ ପରାହତ 

ଦେଖି ହୁଏନି କି ଦେଖାଇ ହୁଏନି ଯେସନେ ଅଜାଗା କ୍ଷତ |

ଲୁଣ ଖାଏ ହାଣ୍ଡି ଚିନ୍ତା ଖାଏ ଗଣ୍ଡି ବଢ଼ିଗଲା ରକ୍ତଚାପ 

ସରଳ ନିଷ୍ପାପ ବିଜୟଙ୍କ ପାଇଁ ଭାଗ୍ୟର ଏ ଅଭିଶାପ |

ଜାର ମହା ରାହୁ ଗ୍ରାସିଦେଲା ଚାହୁଁ ଚାହୁଁ ପୂର୍ଣ୍ଣ କଳାକର 

ଘୁଣଖିଆ ଧନୁ ପ୍ରାୟ ସୁନା ତନୁ ଦୁର୍ବଳୁ ଦୁର୍ବଳତର |

ମାତା ସୁତା ସୁତ ବିଟପ ସହିତ ହୋଇଗଲେ ଏକାକାର 

ଗୃହକର୍ତ୍ତା ଆଜି ଅଲୋଡ଼ା ଅଖୋଜା ଘର ଯଥା କାରାଗାର |

ହୋଇ ହନ୍ତସନ୍ତ ଦିନେ ଅକସ୍ମାତ ପ୍ରାଣପକ୍ଷୀ ଗଲା ଉଡ଼ି 

ପତ୍ନୀ ମୁଖେ ଦୁଃଖ ନଥିଲା ତିଳେକ ଜନତା ଲୋତକେ ବୁଡ଼ି |

ଦୁଶ୍ଚରିତ୍ରା ନାରୀ ସଂସାର ବଇରୀ ଲୋକ କଲେ ଛିଇ ଛିଇ 

ନିନ୍ଦା ଅପନିନ୍ଦା ପଛରେ ପକାଇ ନିର୍ଲଜୀ ରହିଲା ଜିଇ |

ହାରିଲା ବିଜୟ ଧର୍ମ ପରାଜୟ ପାପିନୀର ହେଲା ଜୟ 

ପ୍ରେମ ରାଜ୍ୟ ତାଙ୍କ ହେଲା ନିଷ୍କଣ୍ଟକ ନୂତନ ଭାଗ୍ୟଉଦୟ |

ଏଇତ ଦୁନିଆ ନହୁଅ ଛାନିଆ ଏଠି ସକଳ ସମ୍ଭବ 

ଅଣ୍ଟି ଛୁରୀ ଦିନେ ତଣ୍ଟି କାଟିଦିଏ ବେଳୁ ଚିନ୍ତ ରାଧାଧବ |