ଶୁଭ ଦୀପାଳି

ଆଲୋକର ପର୍ବ ଶୁଭ ଦୀପାଳି ।

ଆସିଛି ଅନ୍ଧାର ଦେବାକୁ ଟାଳି

ସଫା ହେଲା ସବୁ ଘର ଦୁଆର ।

ଶୁଭ ଦୀପାବଳି ଏ ଆଲୋକର

କାର୍ତ୍ତିକ ଆମର ଧରମ ମାସ ।

ଅମାବାସିଆରେ ଦୀପ ପ୍ରକାଶ

ଘରେ ଘରେ ଜଳେ ଶୁଭ ଦୀପାଳି ।

ଘରେ ଓ ବାହାରେ ଆଲୁଅ ଜାଳି

ସଞ୍ଜ ନଇଁଗଲେ ଦୀପାଳି ଜଳେ ।

ଦୀପଦାନ ପର୍ବ ଚଉରା ମୂଳେ

ଦେବ ଋଷି ପିତୃ ପୂପ ଦୀପରେ।

ଘୃତବତୀ ଜାଳି ପୂଜନ କରେ

ସମର୍ପି ନାନାଵିଧ ଫଳମୂଳ ।

ଶ୍ରାଦ୍ଧୀୟ ଦରବ ଆଦି କେବଳ

ବଡବଡିଆଙ୍କୁ ଡକା ହୁଅଇ ।

କାଉଁରିଆ ହୁଳା ବତୀ ଜଳାଇ

ଅନ୍ଧାରରେ ଆସି ଆଲୁଏ ଯାଅ ।

ବାଇଶିପାହାଚେ ଗଡଗଡାଅ 

ପିଠା ମିଠା ଆଲୋକର ପରବ ।

ଦୀପାବଳି ଆମ ଦେଶ ଗରବ

ସାରା ଭାରତରେ ହୁଏ ପାଳନ ।

ଶ୍ୟାମାକାଳୀ ପୂଜା ହୁଏ ଏଦିନ

ରାତ୍ରି ପୂଜା ପାଇ ଜଗଜ୍ଜନନୀ ।

ଭକ୍ତଙ୍କୁ ହୁଅନ୍ତି ବରଦାୟିନୀ

ରାମ ବନବାସେ ରାବଣ ମାରି ।

ଅଯୋଧ୍ୟା ଏଦିନ ଆସିଲେ ଫେରି

ଆନନ୍ଦ ହୋଇଲେ ଅଯୋଧ୍ୟାବାସୀ ।

ଜାଳିଲେ ଦୀପାଳି ହୋଇଲେ ଖୁସି

ରମ୍ଭାବୃକ୍ଷ ପୋତି ଦାଣ୍ଡ ଦୁଆରେ ।

ପାଳିଲେ ପରବ ଆଡମ୍ବରରେ

ତିନିଦିନ ଏ ଦୀପାବଳି ପାଳ ।

ଧନତେରସରୁ ଦୀପାଳି ଜାଳ

ଚାରିମୂଖ ଦୀପ ରଖ ଦୁଆରେ ।

ଚାରୋଟି ବଳିତା ଦିଅ ତହିଁରେ

ଦୀପ ତଳେ ଧାନ ଅବା ଚାଉଳ ।

ଅଥବା ଗହମ ରଖ କେବଳ

ରାଶିତେଲରେ ଏ ଦୀପ ଲଗାଅ ।

ଦୀପାବଳିଦିନ ଯାଏଁ ଜଳାଅ

ତିନିଗୋଟି ଦୀପ ଦକ୍ଷିଣେ ଜାଳ ।

ଧନତେରସରୁ ଜାଳ କେବଳ

ରାଶିତେଲ ଦେଇ ଜାଳ ଏ ଦୀପ ।

ଯମ , ଚିତ୍ରଗୁପ୍ତ , ଧର୍ମ ସମୀପ

ତିନୋଟି ଦୀପ ଏଇ ତିନିଦିନ ।

ଜାଳିବାର ଅଛି ବିଧି ବିଧାନ

ବାଣଫୁଟାଇବା ନିଷେଧ ହେଉ ।

ପ୍ରଦୂଷଣ ମୋଟେ ନବଢୁ ଆଉ

ଆଲୋକ ପରବ ଆମ ଦୀପାଳି ।

ଆସିଛି ଅନ୍ଧାର ଦେବାକୁ ଟାଳି

ଅଜ୍ଞାନ କାଳିମା ହଟୁ ହୃଦରୁ ।

ଜ୍ଞାନର ଆଲୋକ ପ୍ରକାଶ ଭରୁ

ସବୁଦିନ ଆମ ହୃଦେ ଦୀପାଳି ।

ଜଳି ଜାଳୁ ହୃଦୁ କଳ୍ମଷ କାଳି