ରାଜ୍ୟ

ପୂର୍ବେ ଥିଲା ରାଜ୍ୟ ରହିଥିଲେ ରାଜା

ରାଜ୍ୟର ଶାସକ ହୋଇ।

ଏବେ ଅଛି ରାଜ୍ୟ ନାହାନ୍ତି ରାଜନ

ଗଣତନ୍ତ୍ର ବିରାଜଇ ॥

ପୃଥିବୀରେ ଆମ ସାତ ମହାଦେଶ

ତା ମଧ୍ଯରେ କେତେ ଦେଶ ।

ଦେଶ ମଧ୍ଯେ ରାଜ୍ୟ ରହିଛି ଅନେକ

ଜିଲ୍ଲା ବିଭାଗ ବିଶେଷ  ॥

ମହାଦେଶ ଆମ ଏସିଆ ବୋଲାଏ

ଦେଶ ଭାରତ ଆମର ।

ଭାରତ ବର୍ଷରେ ଓଡ଼ିଶା ରହିଛି

ଓଡ଼ିଶା ରାଜ୍ୟ ଆମର  ॥

ରାଜ୍ୟ ସରକାର ରାଜ୍ୟର ଶାସନ

ଚଳାନ୍ତି ଶାସକ ସାଜି ।

ରାଜ୍ୟପାଳ ଜଣେ ରାଜ୍ୟର ମୁଖିଆ

ଶାସନ କରନ୍ତି ଆଜି ॥

ସଙ୍ଘୀୟ ଶାସନ ବ୍ୟବସ୍ଥା ଆମର

ଭାରତୀୟ ଗଣତନ୍ତ୍ର ।

ରାଷ୍ଟ୍ରପତି ରାଜ୍ୟପାଳଙ୍କୁ ନିଯୁକ୍ତି

ପ୍ରଦାନ କରନ୍ତି ସେ ତ ॥

ରାଜ୍ୟ ସରକାର ରାଜ୍ୟକୁ ଚଳାନ୍ତି

ମୁଖ୍ୟମନ୍ତ୍ରୀ ତାର ମୁଖ୍ୟ ।

ମନ୍ତ୍ରିମଣ୍ଡଳର ଗଠନ କରନ୍ତି

ଜନସେବା ଆଭିମୁଖ୍ଯ ॥

ରାଜ୍ୟର ସୁପରିଚାଳନାର ଲକ୍ଷ୍ଯ

ଘେନି ରାଜ୍ୟ ସରକାର।

ହୁଅଇ ଗଠନ ସମ୍ବିଧାନ ବଳେ

ମିଳିଥାଏ ଅଧିକାର ॥

ବିଧାନ ସଭା ଅଛି ଆମ ରାଜ୍ୟରେ

ବିଧାୟକ ନିର୍ବାଚିତ ।

ହେବା ପରେ ଯାଇ ସେ ନେତାଙ୍କୁ

ନେଇ ମନ୍ତ୍ରୀମଣ୍ଡଳ ଗଠିତ ॥

କେନ୍ଦ୍ର ଅନୁଦାନ ପ୍ରାପ୍ତ ହୁଏ ରାଜ୍ଯ

ସ୍ବରାଜସ୍ୱ ଯୁକ୍ତ କରି ।

ବିକାଶ ପଥରେ ଆଗେଇ ଚାଲନ୍ତି

ଜନାଦେଶ ଲାଭ କରି ॥

ଅଚଳ ଯେକାଳେ ରାଜ୍ଯର ଶାସନ

ସମ୍ବିଧାନ ଅନୁଯାୟୀ ।

ହୁଅଇ ଜରୁରୀ ପରିସ୍ଥିତି ରାଜ୍ଯେ

କେନ୍ଦ୍ର ଆରୋପ କରଇ ॥

ରାଷ୍ଟ୍ରପତିଙ୍କର ଶାସନ ଅଧୀନେ

ରାଜ୍ୟପାଳ ଏ ରାଜ୍ୟର ।

ଶାସନ ଚଳାନ୍ତି ଜରୁରୀକାଳୀନ

ପରିସ୍ଥିତିଟି ଗମ୍ଭୀର ॥

ରାଜ୍ୟର ସୁପରିଚାଳନାର ପାଇଁ

ରାଜସ୍ବ ଜିଲ୍ଲା ଗଠନ ।

ହୋଇଥାଏ ତାକୁ ବିଭାଜନ କରି

ହୁଏ ସବଡ଼ିଭିଜନ ॥

ତାକୁ ଭାଗ କରି ହୁଏ ତହସିଲ

ରାଜ୍ୟ ଚଳେ ସୁରୁଖୁରୁ ।

ସ୍ବାୟତ୍ତ ଶାସନ ବ୍ୟବସ୍ଥା ରହିଛି

ରାଜ୍ୟର ହିତ ଦୃଷ୍ଟିରୁ ॥

ମ୍ୟୁନିସିପାଲ କର୍ପୋରେସନ ପୁଣି

ମ୍ୟୁନିସିପାଲିଟି କାହିଁ ।

ଏନ୍. ଏ. ସି .ବ୍ଳକ୍ ପଞ୍ଚାୟତ ରହିଛି

ଗ୍ରାମ ଉନ୍ନୟନ ପାଇଁ ॥