ଶୀତ

ବାର ମାସରେ ବରଷ ପୂରେ

ଦି ମାସେ ଏକ ଋତୁ ।

ବରଷକରେ ଭୋଗ ହୁଅଇ

ସଦା ଛଅଟି ଋତୁ  ॥

ଗ୍ରୀଷ୍ମ ବର୍ଷା ଶରତ ହେମନ୍ତ

ଶୀତ ଆଉ ବସନ୍ତ ।

ଛଅ ଋତୁ ଏ ଗୋଟିଏ ପରେ

ଆସେ ଗୋଟିଏ ସେତ ॥

ହେମନ୍ତ ଅନ୍ତେ ଆସଇ ଶୀତ

ଋତୁ ଏଇ ଧରାରେ ।

ପୌଷ ମାଘ ଏ ଦୁଇଟି ମାସ

ଗଣା ଶୀତ ଋତୁରେ ॥

ଆସିଲେ ଶୀତ ଲାଗଇ ଥଣ୍ଡା

ଥରେ ଆମର ଦେହ ।

ଶୀତ ପୋଷାକ ପରିଧାନରେ

ଆରାମ ଲାଗେ ଦେହ ॥

ନିଆଁ ପୁଆଁଇ ଗରମ ରଖେ

କେହି ଦେହଟି ତାର ।

ଶୀତ ଦିନିଆ ଶୀତଳ ବାଆ

ଶ୍ଳେଷ୍ମା କଫର ଘର ॥

ମଠ ନକରି ବିଲରୁ ଚାଷୀ

ସାରଇ ଧାନକଟା ।

ବେଙ୍ଗେଳା କରି ସାଇତେ ଘରେ

ଖାଇବ ବରଷଟା ॥

ଶୀତ ଋତୁରେ ପୁଷ ମାସରେ

ଆସେ ଦାଣ୍ଡ ପହଁରା ।

ବଉଳ ଅମାବାସିଆ ଆସେ

ତାହାର ପରେ ପରା ॥

ଶାମ୍ବ ଦଶମୀ ପୌଷ ପୂର୍ଣ୍ଣମୀ

ଧନୁ ସଂକ୍ରାନ୍ତି ଆସେ ।

ମାଘେ ରଟନ୍ତି ଚତୁର୍ଦ୍ଦଶୀ ତ୍ରିବେଣୀ

ଅମାସ୍ୟା ଆସେ ॥

ଶ୍ରୀପଞ୍ଚମୀ ଭୀଷ୍ମାଷ୍ଟମୀ ପରେ

ମକର ସଙ୍କରାନ୍ତି ।

ମାଘ ପୂର୍ଣ୍ଣମୀ ଅଗ୍ନିଉତ୍ସବ

ଗ୍ରାମେ ଗ୍ରାମେ କରନ୍ତି ॥

ଶୀତ ଋତୁଟି ଭାରି ବଢିଆ

ଶୀତ ଆମର ମିତ ।

ବେଶୀ ଖରା କି ବରଷା ନାହିଁ

ଦେହକୁ ଆମ ହିତ ॥

ବଣଭୋଜିରେ ବା ଭ୍ରମଣରେ

ଯିବାକୁ ଲାଗେ ଭଲ ।

ଶୀତ ଦିନିଆ ପନିପରିବା

ଦେହକୁ ଭାରି ଭଲ ॥

ଫୁଲ ଫଳର ସମ୍ଭାର ଘେନି

ହସେ ଧରଣୀ ରାଣୀ ।

ଶୀତ ଦିନର କଥା ଶୁଣିଲ

ଦେଲି ଯାହା ବଖାଣି ॥