ଦୀପାବଳି

ହେମନ୍ତ ଋତୁରେ କାର୍ତ୍ତିକ ମାସରେ

କୃଷ୍ଣ ଅମାବାସ୍ୟା ଦିନ ।

ଦୀପାବଳି ପର୍ବ ଆସଇ ଏ ପର୍ବ

ସର୍ବେ କରନ୍ତି ପାଳନ ॥

ଭାଇଚାରାର ଏ ପରବ ଏଥିରେ

ପରିଷ୍କାର ଘରଦ୍ବାର ।

ସାମାନ କିଣିବା ଦୀପାଳି ଜାଳିବା

ପିଠା ମିଠାର ସମ୍ଭାର ॥

ପିତରଙ୍କୁ ଦୀପଦାନ କରି ଏଇ

ପରବ ପାଳନ ହୁଏ ।

ରଙ୍ଗୋଲି ରଙ୍ଗାଇ ଆତସବାଜିର

ଆସରା ଧରା କମ୍ପାଏ ॥

ଘର ସଫା ଲାଗି ଝାଡୁ ହୁଏ କିଣା

ଧନତେରସ ଦିନରେ ।

ସୁନାରୂପା ଗହଣା ଧାତୁ ଦରବ

କେହି କିଣଇ ଖୁସିରେ ॥

ଧନ୍ୱନ୍ତରୀଙ୍କର ଜୟନ୍ତୀ ପାଳିତ

ହୁଅଇ ଏଇ ଦିବସେ ।

ଯମଙ୍କ ତର୍ପଣ ନରକ ଚତୁର୍ଦ୍ଦଶୀ

ଏ ତାହାପରେ ଆସେ ॥

ଦୀପାବଳି ଜାଳି ପୟାଶ୍ରାଦ୍ଧ ହୁଏ

ଅମାବାସ୍ୟାର ସନ୍ଧ୍ୟାରେ ।

ବଡବଡିଆଙ୍କୁ ପିପେଇ ଡାକନ୍ତି

ପୂପ ଦୀପଦାନ ପରେ ॥

ଶ୍ୟାମାକାଳୀ ପୂଜା ହୁଏ ନିଶାର୍ଦ୍ଧରେ

କାର୍ତ୍ତିକ ଅମାବାସ୍ୟାରେ ।

ଦୀପ ଆଲୋକରେ ଝଲସଇ ଘର

ଆଲୋକମାଳା ସଜ୍ଜାରେ ॥

ବିଦ୍ୟୁତ ଆଲୋକେ ଆଜିର ଯୁଗରେ

ହୁଏ ଘର ସଜବାଜ ।

ପ୍ରଦୂଷଣ ବାଣ କେତେ ଫୁଟା ହୁଏ

କହିବାକୁ ମାଡେ ଲାଜ ॥

ବାୟୁ ପ୍ରଦୂଷଣ ଶବ୍ଦ ପ୍ରଦୂଷଣ

ଘାତକ ହେଲାଣି ଭାରି ।

କହିଲେ ସେକଥା ଶୁଣୁଛି ବା କିଏ

ଜୀବନ ଯିବ ବାହାରି ॥

ଶ୍ରଦ୍ଧା ଭକତିରେ ଦୀପଦାନ ଶ୍ରାଦ୍ଧ

କରି ପାଳିବା ଏ ପର୍ବ ।

ଦୀପାଳି ଜାଳିବା ଆଲୋକ ବୁଣିବା

ପରମ୍ପରା ଗଉରବ  ॥