Library
Profile
ମଧୁବାବୁଙ୍କୁ ଖଣ୍ଡେ ଚିଠି
ମଧୁବାବୁଙ୍କୁ ଖଣ୍ଡେ ଚିଠି
ମାଆ ମାଆ ବୋଲି ଡାକୁଥିଲ ତୁମେ ଶୁଣିଲେ ନାହିଁ ସେ ମାଆ,
ଭାଇ ଭାଇ ବୋଲି ଡାକିଲ ଯାହାକୁ ସିଏ ହେଲେନାହିଁ ସାହା |
ମଥାରେ ପଗଡ଼ି ନିଜ ଅଣ୍ଟାଭିଡ଼ି ବୁଲିଲ ରାଇଜ ସାରା,
ରାଜା ପ୍ରଜା ଚାଷୀ ଭେଦଭାବ ନାଶି ବଢ଼ାଇଲ ଭାଇଚାରା |
ଓଡ଼ିଆ ଜାତିର କାନେ ଶୁଣାଇଲ ଏଇ ରାଜ୍ୟ ବୀରଭୂମି,
ଓଡ଼ିଶାର ଭାଷା ଅତ୍ୟନ୍ତ ଉନ୍ନତ ଆସ ତା'ର ପାଦଚୁମି |
ତୁମରି ସପନ ସାକାର ହୋଇଲା ଓଡ଼ିଶା ସ୍ୱତନ୍ତ୍ର ହେଲା,
ଓଡ଼ିଆ ଭାଷାରେ ଚାଲିବ ଶାସନ ଏ'କଥାଟି ମୂଳଥିଲା |
ସ୍ୱାଧୀନ ଦେଶର ସମ୍ବିଧାନ ଲେଖି କହିଲେ ଦେଶର ନେତା,
ନିଜ ମାତୃଭାଷା ବିକାଶ ଦିଗରେ ନିଜରାଜ୍ୟ କରୁଚିନ୍ତା |
ନବକୃଷ୍ଣବାବୁ ମୁଖ୍ୟମନ୍ତ୍ରୀ ହୋଇ ଗଢ଼ିଥିଲେ ଭାଷାନୀତି,
ଇଂରାଜୀ ପ୍ରୀତିରେ ଅଯୋଗ୍ୟ ଅମଲା ଫଟାଇଲେ ଭାଷାଛାତି |
ଯେଉଁଭାଷା ପାଇଁ କରିଲ ଲଢେଇ ତଳକୁ ଯାଏ ସେ ଭାଷା,
>ଓଡ଼ିଆ ବେପାରୀ, ସରକାରୀ କଳେ ଛାଡ଼ୁନି ଇଂରାଜୀ ନିଶା |
ଜାନକୀ କହିଲେ-"ଏଥର ଚାଲିବ ଓଡ଼ିଆ ଶାସନ କଳେ",
ଫସର ଫାଟିଲା ଚକହେଲା ଢିଲା ଅମଲା ଚକ୍ରାନ୍ତ ବଳେ |
ଏବେ ବି ଜନନୀ କରୁଛି ରୋଦନ ତା' ତୁଣ୍ଡରେ ନାହିଁଭାଷା,
ଜନତା ଚାପରେ ଏଥର ନବୀନ ଦେଖାଇଲେ ନୂଆଆଶା |
ଅକର୍ମା ଠକଙ୍କୁ ଦଣ୍ଡ ଦେବାପାଇଁ କାଗଜରେ ଅଛି ନୀତି,
ଇଂରାଜୀ ଲେଖନ୍ତି ଓଡ଼ିଆକୁ ତେଜି ଅଯୋଗ୍ୟ ଫୁଲାନ୍ତି ଛାତି |
ନିଜର ମାଆକୁ ସମ୍ମାନ ଦେବାକୁ କୁଣ୍ଠିତ ଆମର ନେତା,
ମାତୃଭୂମି ପ୍ରତି ନାହିଁ ତିଳେଭକ୍ତି ମାତୃଭାଷା ଲାଗେ ପିତା |
ଅଳପ ପାଠୁଆ ଶିକ୍ଷିତ ବୋଲାନ୍ତି ନଜାଣି ଅତୀତ ଗାଥା,
ନିର୍ଭୁଲ ଇଂରାଜୀ ଧାଡ଼ିଏ ଆସେନି ମୂର୍ଖଙ୍କୁ କହନ୍ତି କଥା |
ଫେରିଆସ ଥରେ ଦେଖିଯାଅ ତୁମ ଜାତି-ଭାଷାର କି' ସ୍ଥିତି,
ପ୍ରଶାସକ ଆଉ ଶାସକ ମନରେ ଜାଗୁ ଟିକେ ଭାଷାପ୍ରୀତି |
