ଓଡ଼ିଆ ଜାତିର ଲଢୁଆ ବୀର-37: ଶିଦୋ-କାହ୍ନୁ

ବଣ ପାହାଡ଼ରୁ ସାନ୍ତାଳ ଭାଇଙ୍କୁ ଧରିଆଣି କେତେଜଣ,

ରେଳଗାଡ଼ି ପାଇଁ ଲାଇନ ପଡ଼ିବ ବେଠିରେ ଚାଲିଲା କାମ |

ମଜୁରି ନପାଇ ଉପବାସେ ରହି ଗୁହାରି କରିଲା ଯିଏ,

ହାକିମଙ୍କଠାରୁ ଗାଳି ଶୁଣିସାରି ପାହାର ଖାଇଲା ସିଏ |

ଅଶାନ୍ତିର ନିଆଁ କୁହୁଳି କୁହୁଳି ଜଳିଲା ବିଦ୍ରୋହ ହୋଇ,

ବିଦ୍ରୋହର ନେତା ହେଲେ ଶିଦୋ-କାହ୍ନୁ ଜୀବନେ ବାଜି ଲଗାଇ |

ସାନ୍ତାଳ ଜାଣିଲେ ଫିରିଙ୍ଗି ଶାସକ ଅନୀତି-ଅନ୍ୟାୟ ମୂଳ,

ଫିରିଙ୍ଗି ହଟିଲେ ଦୁଃଖହେବ ଦୂର ଲୋଡ଼ା ଏକତାର ବଳ |

ଭଙ୍ଗାଡ଼ିହ ଗାଆଁ ଖୋଲା ପଡ଼ିଆରେ ସାନ୍ତାଳ ଶପଥ ନେଲେ,

ଶିଦୋ ଆଉ କାହ୍ନୁ ବୀର ବେଶହୋଇ ଯୁଦ୍ଧର ଡାକରା ଦେଲେ |

ମାରିବେ ମରିବେ ସାନ୍ତାଳ ସମାଜ ବାଜିଲା ନିଶାନ ତୂରୀ,

ପୁଲିସ ଦାରୋଗା ମଲେ ତାଙ୍କହାତେ କଲେକ୍ଟର ଗଲେଡରି |

ଆଖିବୁଜା ଗୁଳି ଫୁଟିଲା ତୁରିତେ ବିପ୍ଳବୀ ଛାଡ଼ିଲେ ପ୍ରାଣ,

ତୀର-ବନ୍ଧୁକର ଯୁଦ୍ଧର ଶେଷରେ ବନ୍ଦୀହେଲେ ନେତାଗଣ |

ଫାଶୀକାଠ ପରେ ଶିଦୋ ଆଉ କାହ୍ନୁ ଗାଇଲେ ମୁକ୍ତିର ଗୀତି,

ସେହି ଗୀତସୁର ସ୍ଵାଧୀନତା ପାଇଁ ପକାଇଲା ମୂଳଭିତ୍ତି |