ପ୍ରେମରେ ଭିଜିବା ଆସ
ପ୍ରେମରେ ଭିଜିବା ଆସ
ହୃଦୟ ଆମର ପ୍ରୀତିର ସେ ଘର
ହିଂସା ଭାବ ମନୁ ନାଶ ।
ସୁନ୍ଦର ସଂସାର ଅତି ମନୋହର
ପ୍ରେମରେ ଭିଜିବା ଆସ ।
ଏ ବିଶ୍ୱ ବ୍ରହ୍ମାଣ୍ଡ ଏକ ପରିବାର
ସଦସ୍ୟ ତାହାରି ଆମେ ।
କେହି ନୁହେଁ ପର ସବୁ ଆପଣାର
ଏହି ଆମ ଧରାଧାମେ ।।
ହସି ହସେଇବା ଚାଲ ଦୁନିଆକୁ
ଦେଖିବା ସଭିଙ୍କ ହସ ।
ସୁନ୍ଦର ସଂସାର ଅତି ମନୋହର
ପ୍ରେମରେ ଭିଜିବା ଆସ ।।
ମିଛ ଅହଙ୍କାର ପରଶ୍ରୀକାତର
ଲୋଭ କର ମନୁ ଦୂର ।
ସତ୍ୟ, ଦୟା, କ୍ଷମା, ସହନଶୀଳତା
ହୃଦେ କରୁ ଆମ ଘର ।।
ଆମ ଏ ଶରୀର ନୁହଁଇ ଅମର
ମାଟିରେ ମିଶିବ ଦିନେ ।
ଜୀବ ଥିଲା ଯାଏଁ ଜୀବେ ଦୟା ପାଇଁ
ସ୍ପୃହା ଆସୁ ଆମ ମନେ ।।
ଅହିଂସା ସ୍ଵଭାବ ହୃଦୟକୁ ଆମ
ସହଜରେ କରୁ ବଶ ।
ହୃଦୟ ଆମର ପ୍ରୀତିର ସେ ଘର
ହିଂସା ଭାବ ମନୁ ନାଶ ।।
ଖୁସି ଆନନ୍ଦରେ ବଞ୍ଚିବା ସଭିଏଁ
ଚାଲୁଥିବା ଯାଏ ଶ୍ୱାସ ।
ସୁନ୍ଦର ସଂସାର ଅତି ମନୋହର
ପ୍ରେମରେ ଭିଜିବା ଆସ ।।