ରାବଣ୍ ପୁଡ଼ି

ବଛର୍ କ ଥରେ ଦସରା ଦସମି

ହେସି ରାବଣର୍ ପୁଡ଼ି

ଜାକ୍ ଜମକ୍ ଥିଁ ପୁଡ଼େଇ ଦେଲେଁ

ଅଧରମ୍ ଜାଏସି କାଏଁ ଉଡ଼ି ।

ପୁତୁଲାର୍ ରାବଣ୍ କେ ଜେତେ ପୁଡ଼େଇ

କରିଦେଲେଁ ଛାର୍ ଖାର୍

ସବୁ ଅନିଏ ଦୁରନିତି କାଣା

ଛାଡ଼ି ପଲାବା ଇ ସଁସାର୍ ।

ଜେତେ ଦିନ୍ ତକ୍ ଆଇନ୍ କାନୁନ୍

ନାଇଁ ହେବା ଦେସେଁ ସକତ୍

ହଜାର୍ ହଜାର୍ ଜିଁଇତା ରାବଣ୍

ପିଇ ଚାଲିଥିବେ ରକତ୍ ।

ରାବଣ୍ କେ ଆଏଜ୍ ପୁଡ଼ଉଛୁଁ ଆମେ

ଅଧର୍ମିଆଁ କାମ୍ ଜେନ୍ କଲା

ଆମେମାନେ ଭିଲ୍ ଅନିଏ କରୁଛୁଁ

କେନ୍ତା ବୁଲୁଛୁଁ ମେଲା ଢିଲା ।

ହେତିର୍ ଲାଗି ସଭେ ଭାବୁଁ ଘାଏ

ରାମର୍ ରାଏଜ୍ ଗଢମା ବଲିଁ

ଆମର୍ ଭିତରେ ଥିବାର୍ କୁକରମ୍ କେ

ଆସ ଦେମା ପୁଡ଼େଇ ଜାଲି ।