ଆଜି ତାର ଜନ୍ମଦିନ

ମାନବ ସେବା ହିଁ ମାଧବ ସେବାର

ସମ୍ମାନନୀୟ ଅଧ୍ୟକ୍ଷ ।

ଉପସ୍ଥିତ ଆମ ସଦସ୍ୟ ସଦସ୍ୟା

ସେବା କାର୍ଯ୍ଯେ ସର୍ବେ ଦକ୍ଷ ।।

ଉପସ୍ଥିତ ଶିଶୁ ଭାଇ ଓ ଭଉଣୀ

ଜ୍ଞାନୀ ଗୁଣୀ ଭଦ୍ର ଜନ ।

ସ୍ୱାଗତ କରୁଛି ଶୁଭ ଜନ୍ମଦିନେ

ଦେଇ ସର୍ବେ ସୁସମ୍ମାନ ।।

"ମାନବ ସେବା ହିଁ ମାଧବ ସେବା" ଯେ

ସ୍ବେଚ୍ଛାସେବୀ ସଂଗଠନ ।

ପୁତ ଘୋଷଯାତ୍ରା ଦିନ ଶୁଭାରମ୍ଭ

ଆଜି ତାର ଜନ୍ମଦିନ ।।

ପାଞ୍ଚ ବର୍ଷ ହେଲା ସେବାକାର୍ଯ୍ୟ ଧାରା

ରହିଅଛି ଅବ୍ୟାହତ ।

ଆସିନାହିଁ କେବେ ଆସିବନି କେବେ

ଘାତ ଆଉ ପ୍ରତିଘାତ ।।

ସମଗ୍ର ଓଡ଼ିଶା ପ୍ରଦେଶରେ ଛନ୍ତି

ସହସ୍ରାଧିକ ସଦସ୍ୟ ।

ସେବାକାର୍ଯ୍ୟ ଭଳି ପୂଣ୍ୟ କାର୍ଯ୍ଯେରତ

ବଦନେ ଫୁଟାଇ ହସ ।।

ଦୁଃଖୀରଙ୍କି ପୁଣି ଅନାଥ ଜନଙ୍କ

ସେବା କରିବାର ଇଚ୍ଛା ।

ଗୁଣ୍ଡୁଚି ମୂଷାର ଭୂମିକା ଆମର

ପାଇ ସଭିଙ୍କ ଶୁଭେଚ୍ଛା ।।

ଗରୀବ ଗୁରୁବା ଭିକାରୀ ବେକାରୀ

ସଭିଙ୍କୁ କରି ଆଦର ।

ମିଳିମିଶି ଆମେ ଆଗକୁ ବଢ଼ିବା

ସର୍ବେ ଭଗ୍ନୀ ସହୋଦର ।।

ମହତ ଉଦ୍ଦେଶ୍ୟ ମହତ କର୍ତ୍ତବ୍ୟ

ହେଉ ସଭିଙ୍କର ଲକ୍ଷ୍ୟ ।

ମାନବ ଜୀବନେ ମାନବୀୟ କର୍ମେ

ସେବା, ଦୟା, କ୍ଷମା ମୁଖ୍ୟ ।।

"ମାନବ ସେବା ହିଁ ମାଧବ ସେବା" ତ

ବାଛି ଅଛି ଏହି ପଥ ।

ସାରା ଦୁନିଆଁରେ ନ ରହନ୍ତୁ କେହି

ଦୁଃଖୀ, ଦରିଦ୍ର, ଅନାଥ ।।

ଆମ ଅନୁଷ୍ଠାନ ପାଳେ ଜନ୍ମଦିନ

ଦେଇ ଏହି ଶୁଭ ବାର୍ତ୍ତା ।

ସଭିଙ୍କ ଉପରେ ଜଗତର ନାଥ

ସେହି ଏକା ତ୍ରାଣକର୍ତ୍ତା ।।