ହସ
ହସ
ଦିବ୍ୟ ଅଳଙ୍କାର ଅଟଇ ହସ,
କରିପାରେ ସିଏ ସଭିଙ୍କୁ ବଶ ।
ଦୁଃଖ ବିପରୀତ ସୁଖ ପ୍ରକାଶ,
କାନ୍ଦ ବିପରୀତ ଅଟଇ ହସ ।
ନକାରାତ୍ମକକୁ ଦେଇ ବିଦାୟ,
ସକାରାତ୍ମକରେ ପାଅ ବିଜୟ ।
ହସ ଆଣେ ସଦା ପ୍ରଫୁଲ୍ଲ ଚିତ୍ତ,
ଖୁସିକୁ କରେ ସେ ନିଜ ଆୟତ୍ତ ।
ସ୍ବାସ୍ଥ୍ୟର ସୁରକ୍ଷା ପାଇଁ ହସିବା,
ହସ ମହୌଷଧି ବୋଲି ଜାଣିବା ।
ଶାନ୍ତି, ମୈତ୍ରୀ, ପ୍ରୀତି ହସରେ ଅଛି,
ହସ ଆଣେ ଆତ୍ମୀୟତାକୁ ବାଛି ।
ହସି ହସାଇବା ସଭିଙ୍କୁ ଭାଇ,
କା ମନରେ ଟିକେ ଦୁଃଖ ନ ଦେଇ ।
ହସ ହସ ମୁହେଁ ରହିଛି ତେଜ,
ନେଇଣ ଶପଥ ହସିବା ଆଜ ।
ଚିନ୍ତା,ଦୁଃଖ, ଅନୁତାପର ଭୟ,
ନ ଥାଏ ରଖିଲେ ହସରେ ଲୟ ।
ହସ ସାଥେ ଆଣେ ସଫଳତାକୁ,
ଆକର୍ଷିତ କରେ ସବୁ ଜନକୁ ।
ଈଶ୍ବର ପ୍ରଦତ୍ତ ଅଟଇ ହସ,
ଜନ ମାନସକୁ କରଇ ବଶ ।
ନାଚିବା, ଗାଇବା, ହସିବା ସର୍ବେ,
ସୁଖ ସୌହାର୍ଦ୍ଦ୍ୟରେ ଜୀଇଁବା ଗର୍ବେ ।