ଗାଉଁଲି ଝିଅ

ଆଣ୍ଠୁତକ ଶାଢ଼ୀ ମଥାରେ ଟିକିଲି

ସରଳିଆ ଠାଣି ତାର,

କାଖେ ଗରା ଧରି ଯାଉଛି ପୋଖରୀ

ଚାଲି ଭାରି ତରବର ।

ନାହିଁ ତାର ଗର୍ବ ନାହିଁ ଅହଙ୍କାର

ଜାଣେ ନାହିଁ କୂଟନୀତି,

ଗାଉଁଲି ଝିଅ ସେ ଲାଜବତୀ କନ୍ୟା

ଚାହାଣୀ ମଉନାବତୀ ।

ଗାଆଁ ବିଦ୍ୟାଳୟେ ପାଠପଢ଼ା ସାରି

ଘର କାମେ ତାର ଲୟ,

ବାପାମାଆଙ୍କର ସାଥେ ଦିନ ବିତେ

ପରିବାରେ ଗେହ୍ଲା ଝିଅ ।

ଗାଉଁଲି ହେଲେ ବି ଭାରି ସ୍ୱାଭିମାନୀ

ସଂସ୍କାରରେ ପରିପୂର୍ଣ୍ଣ,

ଦୁନିଆଁ ଆଗରେ ପରିଚୟ ତାର

ଗାଉଁଲି ଝିଅର ମାନ୍ୟ ।