Click here for New Arrivals! Titles you should read this August.
Click here for New Arrivals! Titles you should read this August.

Er. Prakash Majhi

Inspirational


5.0  

Er. Prakash Majhi

Inspirational


ବନ୍ଧୁ

ବନ୍ଧୁ

1 min 834 1 min 834

ଆସିବାର ବେଳେ ଫୁଙ୍ଗୁଳା ତ ପୁଣି 

ଗଲାବେଳେ ଯାଏ ଏକା ।

ଏ ଧରାଧାମରେ ବଞ୍ଚିବାକୁ ହେଲେ

ଲୋଡାଥାଏ ବନ୍ଧୁ-ସଖା ॥

ସୁଖ ଅବା ଦୁଃଖ, ବିପଦ ସମ୍ପଦ, 

ମାନ ପୁଣି ଅପମାନ ।

ବନ୍ଧୁ ଥିଲେ ସାଥେ, ଦୂର ବି ନିକଟ

ସବୁ ଯେ ଏକ ସମାନ ॥

ଗୁରୁ ପରି କେବେ ଦିଏ ଉପଦେଶ, 

କେବେ ପୁଣି ପିତୃ ସ୍ନେହ ।

ଆଉ କେବେ ଦିଏ ମାଆର ମମତା, 

ଭାତୃଭଗ୍ନୀ ପ୍ରୀତିମୋହ ॥

ରୁଧିର ସମ୍ପର୍କ ନ ହେଲେ ବି ସେତ 

ଅନ୍ତରଙ୍ଗ ମଧୁମୟ ।

ପରମ ଈଶ୍ୱର ଅଭିନବ ସୃଷ୍ଟି

ସର୍ବରଙ୍ଗ ସମନ୍ୱୟ ॥

ସାଗର ଦେହରେ ମିଶିବାକୁ ନଦୀ 

ନିମ୍ନେ ସଦା ବହମାନ ।

ଶିଖାର ବିହୁନେ ରହି କି ପାରିବ

ଜ୍ୱଳମାନ ହୁତାଶନ ॥

ବିଶାଳ ଆକାଶ କିପରି ରହିବ 

ମାଟି ବିନା ସ୍ପର୍ଶ କରି ।

ଶାଖାହୀନ ତରୁ କିପରି ସହିବ 

ପବନ ମାଡଟି ଧରି ॥

ସଖା ଦେଖେ ନାହିଁ ଧନୀ କି ନିର୍ଦ୍ଧନ 

ଧରିରଖେ ହୃଦୟରେ ।

ମହାପ୍ରଭୁ କୃଷ୍ଣ ସୁଦାମା ଚରଣ 

ଧୋଇଥିଲେ ସସ୍ନେହରେ ॥

ସଖା ପାଇଁ ସଖା ପରାଣ ଉତ୍ସର୍ଗେ 

କରେ ନାହିଁ ଅବଶୋଷ ।

ମାନୀ ଦୁର୍ଯ୍ୟୋଧନ ପାଇଁ ଦାନୀ କର୍ଣ୍ଣ

ଜୀବନକୁ କଲା ଶେଷ ॥

ମାଧବ ଶରଣେ ଧନଞ୍ଜୟ ପାର୍ଥ 

ମହାଯୁଦ୍ଧେ ମହାବୀର ।

ସୂର୍ଯ୍ୟଙ୍କ କିରଣେ ଚନ୍ଦ୍ରମା ଯେସନ

ଅନ୍ଧକାର କରେ ଦୂର ॥

ବନ୍ଧୁହୀନ ଜନ ପାଷାଣ ସମାନ

ଜୀବନେ ନ ଥାଏ ସୁଖ ।

ମଧୁର ବିହୁନେ ପାଗଳ ମଧୁପ 

ମେଣ୍ଟିକି ପାରଇ ଭୋକ ॥

ଉତ୍ସବ ବ୍ୟସନ କିବା ରାଜସୁଖ 

ଧନ ସମ୍ପତ୍ତିର ମୋହ ।

ଅଭାବର ବେଳେ ସ୍ୱଭାବ ବଦଳେ 

ସଖା କେବେ ସିଏ ନୁହଁ ॥

ବନ୍ଧୁତ୍ୱ ସମ୍ପର୍କ ଅତି ଅନାବିଳ 

କ୍ଷୀର-ନୀର ପରି ଜାଣ ।

ଉତପ୍ତ ପାବକେ ଦୁହେଁ ଆଗଭର 

ବର୍ତ୍ତିବାକୁ ଅନ୍ୟ ପ୍ରାଣ ॥

ବନ୍ଧୁ ଯେ ଦର୍ପଣ ବନ୍ଧୁ ଯେ ତର୍ପଣ 

ଲକ୍ଷେ ପୂଣ୍ୟଫଳ ବନ୍ଧୁ ।

ବନ୍ଧୁର ତାରଣେ ବନ୍ଧୁର କାରଣେ 

ପଙ୍ଗୁ ଲଙ୍ଘେ ସପ୍ତସିନ୍ଧୁ ॥

ବନ୍ଧୁ ଯେ ଇନ୍ଦ୍ରିୟ ବନ୍ଧୁ ଯେ ଆତ୍ମୀୟ

ବନ୍ଧୁ ଶତ ଜନ୍ମ ଆୟ ।

ବନ୍ଧୁ ଯେ ଔଷଧ ବନ୍ଧୁ ଯେ ଆୟୁଧ

ବନ୍ଧୁ ଥିଲେ ନାହିଁ ଭୟ ॥


Rate this content
Log in

More oriya poem from Er. Prakash Majhi

Similar oriya poem from Inspirational