ମଛିନ୍ଦ୍ର ଘାଟ ଓ ବିମଳେଶ୍ବର

ଆଗଛ ଆଗଛ କୁଢ କୁଢ ମତ୍ସ୍ୟ

     ଆସହେ ମତ୍ସ୍ୟ ଦେବତା

ତୁମ ଆଗମନେ ଏ ଘାଟ ଜଳର

       ବଢିଯିବ ପବିତ୍ରତା ।

ଆସ ବଡ ରାଘୋ ଆସ ସାନ ରାଘୋ

     ଆସହେ କାଳୀ ମହିଷି

ଆସ ସୁନାନାକି ଆସ ରୂପାନାକି

     ଭୋଗକୁ ଦେବି ପରସି ।

ଆମ୍ବ ତଳିଆଣୀ ଜାମୁ ତଳିଆଣୀ

    ଆସ ସବୁ ମାଛ କୁଢ

ଆହାର କରିବା ବେଳ ହୋଇଗଲା

    ତୁଠ ଜଳେ ଆସି ବେଢ ।

କୁଢ କୁଢ ମାଛ ଆସିଥାନ୍ତି ତୁଠେ

      ଆହାର ଆନନ୍ଦେ ଖାଇ

ଧୀରେ ଧୀରେ କରି ଯେ ଯାହା ବାଟରେ

ଯାଆନ୍ତି ସବୁ ପଳାଇ ।

ଜଣା ଏହି ତୁଠ ତା' ମଛିନ୍ଦ୍ର ଘାଟ

    ମହାନଦୀର ଏ ଜଳ

ସମ୍ବଲପୁରର ହୁମା ଠାରେ ଥିବା

    ଶିବ ମନ୍ଦିରର ତଳ ।

ଧନୁ ପାଲି ଠାରୁ ସୋନପୁର ରାସ୍ତା

     ଚବିଶ କିଲୋମିଟର

ଯାଇ ବାଟ ଭାଙ୍ଗି ଡାହାଣକୁ ଗଲେ

      ପଡଇ ସେଇ ମନ୍ଦିର ।

ଦୂରରୁ ଦେଖିଲେ ଯେଉଁ ଦିଗୁଁ ଦେଖ

      ମନ୍ଦିର ଦିଶଇ ତେଢା

କିନ୍ତୁ ପାଖେ ଯାଇ ଦେଖିଲେ ଜାଣିବ

     ସିଧା ହୋଇଅଛି ଛିଡା ।

ମହାଦେବ ବାବା ବିମଳେଶ୍ବରଙ୍କ

      ଆବିର୍ଭୂତ ଶିବଲିଙ୍ଗ

ତେଣୁ ତାଙ୍କ ନାମ ତୁଣ୍ଡରେ ଧରିଲେ

     ମୁଣ୍ଡ ନଇଁ ଯାଏ ଆଗ ।

ବାବାଙ୍କ ମନ୍ଦିର ପାହାଡ ଉପରୁ

      ଓହ୍ଲାଇଲେ ପଶ୍ଚିମକୁ

ମହାନଦୀ ଜଳେ ମାଛ ଖେଳୁଥିବେ

     ଘାଟେ ଦେଖିବ ତାହାଙ୍କୁ ।

ପ୍ରତ୍ୟକ୍ଷ ସେ ଦିଅଁ ପ୍ରତ୍ୟକ୍ଷ ମନ୍ଦିର

     ଲୋକ ମୁଖୁ ଶୁଣା ଯାହା

ସ୍ବୟଂ ଦେବଶିଳ୍ପୀ ବିଶ୍ବକର୍ମାଙ୍କର

      ନିର୍ମାଣ ମନ୍ଦିର ଏହା ।

ହେ ବାବା ବିମଳେଶ୍ବର ମହାଦେବ

     କୃପା ଦୃଷ୍ଟି ରଖିଥାଅ

ବିପଦେ ଆପଦେ ଓଡିଶା ବାସୀଙ୍କୁ

    ସର୍ବଦା ସହାୟ ହୁଅ ।