ମନେ ପଡେ ପିଲାଦିନ

ହସି ହସେଇବା             ପିଲାଦିନ କଥା

          ପଡୁଅଛି ମୋର ମନେ

ସଭିଙ୍କ ଖୁସିରେ               ଉଲ୍ଲାସିତ ମନ

            ତୃପ୍ତି ଆସଇ ଜୀବନେ । 

ବାଲି ଅଗଣାରେ          ଖେଳୁଥିଲେ ଖେଳ

           କେତେ ଯେ ବାଲିଘର

ସେ ବେଳ ଆନନ୍ଦ         କହିଲେ ନ ସରେ

            ଅଭୁଲା ସ୍ମୃତି ମୋହର ।

ବଦଳି ଗଲାଣି               ସମାଜର ନୀତି

           ଦେଖୁଅଛୁ ନୂଆ ଲୀଳା

ଆଉ କି ପାଇବା             ସେଇ ମଜାଳିଆ

            ସବୁତ ସରି ଆସିଲା ।

ସମାଜ ସବୁକୁ               ବଦଳାଇ ଦେଲା

           ସମୟ ତା' ବାଟେ ଗଲା

ନୁଆ ନୁଆ ସବୁ              ଗଢି ହୋଇଗଲା

           ଦେଖି ବାକୁ ନ ମିଳିଲା ।

ବାପାଙ୍କ ସାଥିରେ            ଶଗଡ ଗାଡିରେ

           ବସି ଯାଉଥିବା ମଜା

ସେଇ କଥା ଭାବି           ମନେ ପକାଇଲେ

           ଅତୀତ ହୁଅଇ ତାଜା ।

ପାଇବା କି ଆଉ            ସେଇ ପିଲାବେଳ

           ସବୁତ ଯାଇଛି ସରି

ମନ କଥା ସିନା                ମନରେ ରହିଛି

           ଆଉ କି ଆସିବ ଫେରି ।

ବିଜ୍ଞାନ ବଳରୁ                 ନୂଆ ନୂଆ ବାଟ

           ପରିବର୍ତ୍ତନ ହୋଇଲା

ପୁରୁଣା ଚଳଣି                ଉଭେଇ ଗଲାଣି

           ନୂଆ ସବୁ ଆସିଗଲା ।

କିଏ ଜାଣିଥିଲା               ଏପରି ହୋଇବ

          ସମୟର କରାମତି

ଉନ୍ନତି ଦିଗରେ                   ପରିବର୍ତ୍ତନର

           ବଦଳି ଯାଇଛି ସ୍ଥିତି ।

ଦିନ ସିନା ଗଲା              ତା'ବାଟରେ ଚାଲି

         ଭୂଲିନି ସେ କଥା ମନ

ସମୟେ ସମୟେ              ଏକାନ୍ତରେ ଥାଇ

          ମନେ ପଡେ ପିଲାଦିନ ।