ଶୀତ ଲେଉଟାଣି
ଶୀତ ଲେଉଟାଣି
ଆସିଥିଲା ଶୀତ ମାଉସୀ କେବେଠୁ
ପୁଷ ମାସ ହେଲା ଦିନୁ ।
ଚଦର କମ୍ବଳ ସବୁ ବାହାରିଲା
ଶୀତୁଆ ଲାଗିଲା ତନୁ ।୧।
ରେଶମ ପଶମ ବସନ ସବୁ ତ
ଆମର ଲୋଡା ହୋଇଲା ।
ଉଷୁମ ଉଷୁମ ଖାଇବା ପାଇଁକି
କେଡେ ବଢିଆ ଲାଗିଲା ।୨।
ଗରମ ପାଣିରେ ଗାଧୁଆପାଧୁଆ
ସବୁ ଚାଲିଲା ଆମର ।
କେତେଦିନ ଗଲା ଶୀତ ଚାଲିଗଲା
ନସରୁଣୁ ଋତୁ ତାର ।୩।
ଦଶ ବାର ଦିନ ନଯାଉଣୁ ପୁଣି
ଲେଉଟି ଆସିଲା ଶୀତ ।
ଋତୁରାଜ ଆଗମନୀ ହେଲେ ସିନା
ଶୀତ ହେବ ପରାହତ ।୪।
ଶୀତ ଆମ ମିତ ଏ ଶୀତ ଦିନଟି
ଆମ ପାଇଁ ଭାରି ଭଲ ।
ଦେହ ଭଲ ରହେ ମନ ଭଲ ରହେ
ଶୀତ କେବେ ନୁହେଁ ଶଲ ।୫।
ଲେଉଟାଣି ଶୀତ ଆସିଛି ତ ଆସୁ
ଡରିବା କାହିଁକି ଆମେ ।
ଉଷ୍ଣ ଉପଚାର କରିବା ଯେପରି
ଅସୁସ୍ଥ ନହେବା ଭ୍ରମେ ।୬।
କାଳଚକ୍ର ଗତି କରି ଚାଲିଥିବ
ହେବ ନାହିଁ କେବେ ସ୍ଥିର ।
ସମୟ ଆସିବ ଶୀତ ଚାଲିଯିବ
ନହୁଅ କେବେ ଅସ୍ଥିର ।୭।